Tags-Bahaar

jab kabhī kisī gul par ik zarā nikhār aayā
kam-nigāh ye samjhe mausam-e-bahār aayā

ahl-e-junūñ ko fasl-e-ḳhizāñ se ab ke bhī go na rabt rahā
ab ke bahār vo aa.ī kī jis kī bū-e-gul bhī safīr na thī

ajab nahīñ bahār-rut meñ saañp bhī huuñ baaġh meñ
kisī gulāb kī jagah kisī kalī kī aaḌ meñ

ek anjām-e-tai-shuda ke liye
phir ḳhizāñ ko bahār kī zid hai

sahāb o sail dho sakte nahīñ gard-e-falākat ko
bahār aa.ī magar duniyā kī vīrānī nahīñ jaatī

paroñ se muñh ko chhupā kar qafas meñ aa baiThā
chaman kā haal na dekhā gayā bahār ke ba.ad

maiñ naved-e-bahār laayā thā
tazkira har chaman chaman merā

ġhunche chaTak ga.e chaman-e-rozgār ke
phūTe habāb mauj-e-nasīm-e-bahār ke

dil dhaḌak dhaḌak uThā yuuñ kisī ko dekh kar
jis tarah bahār meñ nabz-e-gulistāñ chale

ye gul khile haiñ ki choTeñ jigar kī ubhrī haiñ
nihāñ bahār thī bulbul tire tarāne meñ

junūñ se bhuul huī dil pe choT khāne meñ
'firāq' der abhī thī bahār aane meñ

haath meñ jo hai bahār us ko to aane diije
kāġhazoñ par to hare peḌ banāyā kiije

mujhe to rañj qabā-hā-e-tār-tār kā hai
ḳhizāñ se baḌh ke guloñ par sitam bahār kā hai

vo sāvan meñ kaalī ghaTā kī bahār
vo barsāt kī halkī halkī phuvār

isī se hai is zindagī kī bahār
vatan kī mohabbat ho yā maañ kā pyaar

ab tak usī ravish pe hai 'akbar'-e-mast-o-be-ḳhabar
kah de koī azīz-e-man fasl-e-bahār ho chukī

sunā ke ahl-e-junūñ ko bahār kā muzhda
havās vaale bhī ik samt bad-havās chale

ḳhizāñ kā daur bhī aatā hai ek din 'kaifī'
sadā-bahār kahāñ tak daraḳht rahte haiñ

ḳhanda-e-gul bhī vahī girya-e-shabnam bhī vahī
ham to samjhe the na.e Dhab se bahār aa.ī hai

ham qafas vāloñ ko itnā to batā de koī
kyā ye sach hai ki gulistāñ meñ bahār aa.ī hai