Tags-Bahaar

tere qurbān 'qamar' muñh sar-e-gulzār na khol
sadqe us chāñd sī sūrat pe na ho jaa.e bahār

ye bhī kuchh baat huī gul hañse tum ruuTh ga.e
is pe ye zid ki abhī ḳhaak meñ mil jaa.e bahār

muñh se kuchh bhī dam-e-ruḳhsat na kahā bulbul ne
sirf sayyād ne itnā to sunā haa.e bahār

sub.h gul-gasht ko jaate ho ki sharmā.e bahār
kyā ye matlab hai gulistāñ se nikal jaa.e bahār

hukm-e-sayyād hai tā-ḳhatm-e-tamāshā-e-bahār
saarī duniyā kahe bulbul na kahe haa.e bahār

koī to jur.a-kash-e-jām-e-arġhavānī ho
kisī ko hijr ke ġham meñ lahū rulā.e bahār

safed bāloñ pe kyā rañg de rahā hai ḳhizāb
ab ibtidā-e-ḳhizāñ hai aur intihā-e-bahār

qafas-nasīboñ ko taḌpā ga.ī havā-e-bahār
chhurī sī dil pe chalī jab chalī havā-e-bahār

khaḌī huī hai asā Teke nargis-e-bīmār
is intizār meñ hai dekhiye kab aa.e bahār

qafas pe rakhiyo na sayyād baar phūloñ kā
kahīñ asīroñ ko zālim na yaad aa.e bahār

nasīm sehn-e-chaman meñ pachhāḌeñ khātī hai
to dil ko aur bhī taḌpātī hai adā-e-bahār

havā meñ āj-kal ik dhīmī dhīmī vahshat hai
isī zamāne se shāyad hai ibtidā-e-bahār

husn ko us ke ḳhat kā daaġh lagā
par hameñ to bahār o baaġh lagā

vā.izāñ muzhda ki jannat meñ bahār aa.ī hai
merī duniyā se ḳhizāñ lauT ke jaa.e to bane

kyā naam batā.eñ ham us kā nāmoñ kī bahut rusvā.ī hai
kuchh ab ke bahār-e-tāza-nafas ik daur-e-vafā be-nām chale

yak chashmak-e-pyāla hai saaqī bahār-e-umr
jhapkī lagī ki duur ye āḳhir hī ho chukā

phir jo hai bāġh-e-nabuvvat aur imāmat kī bahār
ġhuncha-e-gul sabza-e-ambar-fishāñ ko ishq hai

har taraf gulzār hai sabzān aur āb-e-ravāñ
apnī nazroñ meñ bahār-e-gul-fashāñ ko ishq hai

bahār-e-husn javāñ-marg sūrat-e-gul-e-tar
misāl-e-ḳhār magar umr-e-dard-e-ishq darāz

ġharīboñ ke gharoñ meñ ek bhī raunaq nahīñ baaqī
bahār-e-qasr-e-sultānī jo pahle thī vo ab bhī hai