Tags-Bahaar

majbūriyāñ sitam haiñ vagarna ḳhudā kī shaan
maiñ aur yuuñ guzār duuñ mausam bahār kā

le haath meñ qafas Tuk sayyād chal chaman tak
muddat se hai hameñ bhī sair-e-bahār ḳhvāhish

sair-e-chaman hai aur vo gul-rū kanār meñ
maiñ be-piye bhī mast huuñ ab kī bahār meñ

ḳhanjar-e-qātil se jannat kī havā aane lagī
aur bahār-e-zaḳhm se firdaus kā manzar khulā

ashk-e-ḳhūñ se zard chehre par hai kyā turfa bahār
dekhiye rañg-e-junūñ kaisā mire muñh par khulā

niklegā ab ke jo bhī tirā ai muġhāñ-navāz
phūloñ meñ rakh ke deñge tujhe ham bahār meñ

maiñ ne bhī tauba toḌ dī apnī to kyā huā
duniyā ke log kyā nahīñ karte bahār meñ

kab se huuñ kyā batā.ūñ talāsh-e-bahār meñ
ik phuul bhī na thā chaman-e-rozgār meñ

bulbul na phuul ḳhanda-e-sub.h-e-bahār par
nādāñ kahīñ ye ḳhanda-e-dandāñ-numā na ho

gulchīñ bahār-e-gul meñ na kar man-e-sair-e-bāġh
kyā ham ġhubār dāman-e-bād-e-sabā ke haiñ

ḳhū-e-lail-o-nahār dekhī hai
talḳhiyoñ kī bahār dekhī hai

hai āḳhir-e-umr is chaman meñ
do chaar hī din bahār hai aur

'munīr' dekh shajar chāñd aur dīvāreñ
havā ḳhizāñ kī hai sar par shab-e-bahār meñ huuñ

bahār aate hī yuuñ lagā ki chaman darīda-dahan huā hai
gulāb-rut meñ chaman pe nāzil ye āfateñ bhī na.ī nahīñ haiñ

jin kī miTTī ḳhizāñ se uTThī ho
mil sakegā unheñ bahār meñ kyā

udhar sabā ne ḳhabar dī aa kar ki aaj abr-e-bahār aayā
idhar garebāñ siye hue maiñ chaman meñ dīvāna-vār aayā

aap ne jab tavajjoh farmā.ī
gulshan-e-zīst meñ bahār aa.ī

jis chaman meñ sadiyoñ se thā bahār kā qabza
us meñ hai ḳhizāoñ kā ab chalan na jaane kyuuñ