Tags-Barg

chaman meñ vo farāmoshī kā mausam thā maiñ ḳhud ko bhī
zamīñ par barg-e-āvāra nazar aayā to yaad aayā

tū bhī ḳhushbū hai magar merā tajassus bekār
barg-e-āvāra kī mānind Thikāne mere

but-parastoñ kuuñ hai īmān-e-haqīqī vasl-e-but
barg-e-gul hai bulbuloñ kuuñ jild-e-qur.ān-majīd

tā-sub.h barg-o-shāḳh-o-shajar jhūmte rahe
kal shab balā kā soz havā ke gale meñ thā

barg-e-āvāra bhī ik mutrib hai
tā.ir-e-naġhma-sarā ġhaur se sun

ravish ravish pe rahā āftāb kā saaya
jahān-e-ġhuncha-o-barg-o-samar pe dhuup rahī

ho farāġhat to zarā jhāḌū ḳhayāloñ ke shajar
shāḳh-sāroñ pe bahut barg-e-ḳhizāñ pāoge

tū mere dasht-e-harf-o-saut ko barg-e-ḳhamoshī de
tū merī aañkh meñ gum-gashta-e-hairat-nishāñ ho jā

falak ne pheñk diyā barg-e-gul kī chhāñv se duur
vahāñ paḌe haiñ jahāñ ḳhār-zār bhī to nahīñ

yuuñ pisne ko dil laakh piseñ barg-e-hinā par
vo haath kabhī ḳhuun meñ bhartā hī nahīñ hai

raqsāñ hai nasīm barg-e-gul par
shabnam meñ hai ghuñgrūoñ kī chhan-chhan

ki barg-hā-e-ḳhizāñ dāda-jūñ uḌaa.e hue
kashāñ kashāñ liye phirtī haiñ vahshateñ apnī

juuñ barg ḳhizāñ-dīda sab zard hue ham to
garmī ne hameñ dil kī āḳhir ko jalā rakhā

vo ik qatra ki barg-e-dil pe shabnam sā laraztā thā
huā hai bahr-e-nā-paidā-kanār āhista āhista

sivā.e gul ke vo shoḳh añkhiyāñ kisī taraf ko nahīñ haiñ rāġhib
to barg-e-nargis upar bajā hai likhūñ jo apne sajan kuuñ patiyāñ

barg-e-ḳhizāñ-rasīda se aatī thī ye sadā
is bāġh-e-sabz par kaf-e-afsos mal ke chal

rañg laayā mirā be-barg-o-navā ho jaanā
itnā āsān na thā us kā ḳhudā ho jaanā

baar se aaj har ik shāḳh jhukī jaatī hai
yā chaman meñ kabhī be-barg-o-samar maiñ hī thā

ye mumkin hai ḳhizāñ ke ba.ad bhī mausam na raas aa.e
to aisā bhī nahīñ barg-o-samar kī baat mat socho

ik ābshār pe mānind-e-barg-e-āvāra
koī maqām hai apnā na koī manzil hai