Tags-Barg

yahī bahut hai ki miTTī jaḌoñ se lipTī hai
vagarna aaj daraḳhtoñ meñ barg-o-bār nahīñ

zard pattoñ ke ThanDe badan apne hāthoñ pe le kar havā ne shajar se kahā
agle mausam meñ tujh par na.e barg-o-bār ā.eñge tab talak sabr kar yā aḳhī

āzurda is chaman meñ huuñ mānind-e-barg-e-ḳhushk
chheḌe jo Tuk nasīm mujhe sau ġhulū karūñ

saarī ummīdoñ ne dam toḌ diyā
naḳhl-e-be-barg-o-samar yaad aayā

fazā meñ uḌtā huā kahīñ se ajab nahīñ aks-e-barg aa.e
ḳhizāñ ke be-rañg āsmāñ se aTī huī jhiil chal ke dekheñ

rañg phir aaj digar barg-e-dil-e-zār kā hai
shā.iba mujh ko havā par tirī raftār kā hai

havā.eñ le ke uḌeñgī to barg-e-āvāra
nishān kitne na.e rāstoñ kā pā.egā

laḳht-e-dil barg-e-dil kī tarz jhaḌe
mizha kī shāḳh-sār se ab kī

ai ki terā mizāj shabnam sā
barg-e-dil par qayām kartā jā

jo mere ashk the barg-e-ḳhizāñ kī tarh gire
baras ke khul gayā abr-e-bahār maiñ bhī thā

but-parastoñ kuuñ hai īmān-e-haqīqī vasl-e-but
barg-e-gul hai bulbuloñ kuuñ jald-e-qur.ān-e-majīd

baaġh meñ ye na.ī sāzish hai ki sābit ho jaa.e
barg-e-gul kā ḳhas-o-ḳhāshāk se kam-tar honā

jaise ḳhizāñ-rasīda koī barg-e-dasht meñ
phirte haiñ dil meñ dard ko pinhāñ kiye hue

toḌ kar is ko bhī ab koī havā le jā.egī
ye jo barg-e-sabz ke mānind hai merā hunar

barg-e-gul par charāġh sā kyā hai
chhū gayā thā use dahan merā

us bin rahā chaman meñ bhī maiñ 'zauq' dil-ḳharāsh
nāḳhun se tez-tar mujhe har barg-e-gul huā

tez-tar lahja-e-guftār kiyā hai ham ne
barg-e-gul ko kabhī talvār kiyā hai ham ne

na jaane kaun sī aafat kā pesh-ḳhema hai
ye barg sabz havāoñ ne kyuuñ uchhāle haiñ

har phuul pe us shaḳhs ko patthar the chalāne
ashkoñ se har ik barg ko bharnā thā hameñ bhī