Tags-Barham

tumhārī yaad hī ke saath dhaḌkan baḌh ga.ī dil kī
tasavvur se mizāj-e-husn to barham nahīñ hotā

mujh ko hālāt kī talḳhī ne kiyā hai barham
merī guftār ko talvār na jaane koī

anjām-e-vafā bhī dekh liyā ab kis liye sar ḳham hotā hai
nāzuk hai mizāj-e-husn bahut sajde se bhī barham hotā hai

kuchh to hassās ham ziyāda haiñ
kuchh vo barham ziyāda hotā hai

chune the chaar tinke ek din sehn-e-gulistāñ meñ
rahā tā-zindagī barham mizāj-e-bāġhbāñ ham se

jab tak hamāre sāmne jām-e-sharāb hai
barham mizāj-e-gardish-e-daurāñ kareñge ham

zāhid namāz bhūlā idhar dekh kar tujhe
barham butoñ se apne udhar barhaman huā

sar-e-niyāz kabhī us ke sāmne na jhukā
isī qusūr pe ham se zamāna barham hai

tasavvur kījiye us aane vaale daur-e-barham kā
gadā toḌeñge jab pindār-e-shāhāna to kyā hogā

mujh se barham hai falak itnī sī ḳhvāhish pe mirī
toḌ kar ek sitāre ko rakhūñ kāġhaz par

vo barham hoñge duniyā jaan legī raaz ulfat kā
vafā par harf aa jā.egā do aañsū bahāne meñ

jaan tak to nahīñ hai tujh se dareġh
ai maiñ qurbān kyuuñ tū barham hai

saath nibhāne kī Thānī hai to ye bhī sun lo
in rāhoñ meñ saaya bhī barham ho jaatā hai

terā ġham ham dīvānoñ ko kis aalam meñ chhoḌ gayā
ek zamāna ham se ḳhafā hai ek jahāñ se ham barham

is shahr ke log baḌe hī saḳhī baḌā maan kareñ durveshoñ kā
par tum se to itne barham haiñ kyā aan ke maañg liyā tum ne

mutma.in koī nahīñ hai is se
koī barham hai to ḳhā.if koī

mujh meñ basī huī thī kisī aur kī mahak
dil bujh gayā ki raat vo barham nahīñ milā

ye kis se aaj barham ho ga.ī hai
ki zulf-e-yār pur-ḳham ho ga.ī hai

ye terī tavajjoh kā hai ejaaz ki mujh se
har shaḳhs tire shahr kā barham hai mirī jaañ