Tags-Barham

duur tak phailā huā hai ek an-jānā sā ḳhauf
is se pahle ye samundar is qadar barham na thā

yahī haiñ adnā sī ik adā se jinhoñ ne barham hai ki ḳhudā.ī
yahī haiñ akasr qazā ke jin se farishte bhī zak uThā chuke haiñ

nigāh-e-yār ko barham kiyā hai maiñ ne ḳhud akasr
kabhī jo dard ko dil ke zarā ārām dekhā hai

barham hai is qadar jo mire dil se zulf-e-yār
shāmat-zada ne kyā kiyā aisā ḳhilāf-e-zulf

gila mujh se thā yā merī vafā se
mirī mahfil se kyuuñ barham ga.e vo

tasavvur meñ vo kuchh barham se haiñ kuchh mehrbāñ se haiñ
unheñ shāyad sunā.ī jā rahī hai dāstāñ merī

be-ruḳhī tū ne bhī bartī jo ḳhudāyā un se
tujh se barham tire insān bhī ho sakte haiñ

shauq-e-gustāḳh ne aksar tumheñ barham kar ke
haa.e vo lutf uThāyā hai ki jī jāntā hai

maiñ apne-āp se barham thā vo ḳhafā mujh se
sukūñ se kaise guzartā ye rāsta mujh se

zulf-e-barham sambhāl kar chaliye
rāsta dekh-bhāl kar chaliye

dekho to 'qamar' un ko bulā kar shab-e-vāda
taqdīr pe barham na ho tadbīr se pahle

lagtā hai kuchh anhonī sī hone vaalī hai
darham-barham hone ko hai jaise nizām-e-dahr

bisāt-e-aish-o-tarab hai barham ye hai nasheb-o-farāz-e-ālam
piyāda haiñ un ko dekhte ham jinheñ hamesha savār dekhā

sabā barham agar zulf-e-darāz-e-yār ho jaa.e
qayāmat karvaTeñ letī huī bedār ho jaa.e

tere muhīt meñ kahīñ gauhar-e-zindagī nahīñ
DhūñD chukā maiñ mauj mauj dekh chukā sadaf sadaf

hañsī bhī merī nauha hai mirā naġhma bhī mātam hai
junūñ bhī mujh se barham hai ḳhirad bhī mujh se barham hai

bahut latīf the nazzāre husn-e-barham ke
magar nigāh uThāne kā kis ko yaarā thā

garche kyā kuchh the magar aap ko kuchh bhī na ginā
ishq-e-barham zan-e-kāshāna-e-pindār rahā

bahut din baad ḳhat aayā hai un kā
mizāj-e-dil-barāñ barham bahut hai

shiddat-e-dard hī hotī kahīñ ġhārat-gar-e-hosh
baḳht itnā to na barham-zan-e-sāmāñ hotā