Tags-Bharosa

use ab bhuul jaane kā irāda kar liyā hai
bharosa ġhāliban ḳhud par ziyāda kar liyā hai

alāva is ke mujhe aur kuchh malāl nahīñ
vo maan jā.egā is baat kā bharosa thā

koī va.ada vafā ho jaa.e shāyad
bharosa aaj bhī hai jān-e-jāñ par

insān kī niyyat kā bharosa nahīñ koī
milte ho to is baat ko imkān meñ rakhnā

hai vafāoñ par bharosa rañg lā.eñgī zarūr
jaag uTThegā kabhī merā muqaddar dekhnā

thā rahbaroñ pe bharosa to ab bhaTaktā huuñ
mujhe ḳhabar hī nahīñ thī fareb-e-manzil kī

ehtiyāt-o-ḳhauf vaale Dūbte haiñ beshtar
jin ko hai ḳhud par bharosa vo nadī ke paar hai

kab hai ham ko sab pe bharosa
ham ko hai bas rab pe bharosa

mujh ko nahīñ aah kā bharosa
ya.anī ki ye be-asar bahut hai

yuuñ mulāqāt kā ye daur banā.e rakhiye
maut kab saath nibhā jaa.e bharosa kyā hai

dard baḳhshā chain chhīnā dil ke TukḌe kar diye
haa.e kis zālim pe maiñ ne bhī bharosa kar liyā

itnā sāñsoñ kī rifāqat pe bharosa na karo
sab ke sab miTTī ke ambār meñ kho jaate haiñ

jalvat kā bharosa hai na ḳhalvat kī tavaqqo
sab vahm thā yāroñ ne jo taake the Thikāne

dil ko tirī chāhat pe bharosa bhī bahut hai
aur tujh se bichhaḌ jaane kā Dar bhī nahīñ jaatā

umr jitnī bhī kaTī us ke bharose pe kaTī
aur ab sochtā huuñ us kā bharosa kyā thā

tū ne tauba to kar lī magar ai 'ḳhumār'
tujh ko rahmat pe shāyad bharosa nahīñ

hai dukh to kah do kisī peḌ se parinde se
ab aadmī kā bharosa nahīñ hai pyāre koī

jis ne luTte hue dekhā hai tamaddun apnā
us se kahte ho rahe tum pe bharosa kar ke

tirī ḳhashmagīñ aañkh kī gardishoñ ne zamāne ko zer-o-zabar kar diyā hai
sahāroñ pe koī bharosa kare kyā sahāre to ḳhud DhūñDte haiñ sahāre

apnī mehnat par bharosa hai hameñ
hai nahīñ ḳhvāhish kisī ḳhairāt kī