Tags-Charagh

kisī ko hotā nahīñ yuuñ mohabbatoñ kā yaqīñ
charāġh bujh ke batā.e havā zarūrī hai

ik aarzū mujhe kyā kyā fareb detī hai
bujhe charāġh meñ bhī raushnī sī lagtī hai

shaam se kaliyāñ dard kī mahkīñ jalte rahe ashkoñ ke charāġh
jaise sabā gulzār se guzre ham ne aise guzārī raat

sub.h hote bujh ga.e saare charāġh
dāġh-e-dil tā shaam jaltā hī rahā

tere aañsū the ki be-dāġh sitāroñ ke charāġh
umr-bhar ke liye ham apnī sazā bhuul ga.e

diloñ meñ naqsh haiñ ab tak tirī zabāñ ke suḳhan
hamārī raah meñ goyā charāġh haiñ raushan

aap ke ghar meñ har taraf manzar-e-māh-o-āftāb
ek charāġh-e-shām agar maiñ ne jalā liyā to kyā

apnā ḳhirām tez na kar ai nasīm-e-zīst
bujhne ko huuñ charāġh-e-sahar huuñ zarā Thahar

raat aatī hai to tāqoñ meñ jalāte haiñ charāġh
ḳhvāb zinda haiñ so āñkhoñ meñ jalāte haiñ charāġh

vaqt ke saath hī gul ho ga.e vahshat ke charāg
ik siyāhī hai jo tāqoñ pe abhī rah ga.ī hai

vo ham se sadiyoñ purānā charāġh chhīn ga.e
na.e charāġh purāne charāġh ke badle

parvānā-o-charāġh par aatā hai mujh ko rashk
kis tarah tum se uḌ ke lipaT jā.ūñ bas nahīñ

paanī meñ ik charāġh kī lau nam gudāz surḳh
paanī meñ koī aks ajab zard sā bhī hai

sahar se rishta-e-ummīd bāñdhne vaale
charāġh-e-zīst kī lau shaam hī se maddham hai

kahīñ koī charāġh jaltā hai
kuchh na kuchh raushnī rahegī abhī

laḌ jaate haiñ saroñ pe machaltī qazā se bhī
Darte nahīñ charāġh hamāre havā se bhī

zulmat-parast charāġh the aise bhī kuchh 'razā'
jalte rahe magar jo ujālā na kar sake

ye sochiye ki kyoñ havā pe zor chal nahīñ rahā
kisī bhī ruḳh se aap kā charāġh jal nahīñ rahā

tum to sachche ho magar dil kā bharosa kuchh nahīñ
bujh na jaa.e ye charāġh-e-intizār agle baras

charāġh ban ke chamaktā huuñ sañg-rezo meñ
savād-e-shab mujhe aisā hunar bhī aatā hai