Tags-Charagh

kahe detā hai ḳhud āġhāz hī anjām kyā hogā
tirī ātish-bayānī se charāġh-e-shām kyā hogā

maiñ jab bhī ghar se nikaltā huuñ raat ko tanhā
charāġh le ke koī saath saath chaltā hai

maiñ apne sūraj ke saath zinda rahūñgā to ye ḳhabar milegī
gulāb kis shāḳh par khilegā charāġh kī lau kahāñ rukegī

ye hādsa hai ki shole meñ jaan hai merī
mujhe charāġh se āzād kyuuñ nahīñ karte

mehr us ruḳh ke aage afsurda
juuñ charāġh-e-mazār hovegā

kaise ik fard ke hoñToñ kī zarā sī jumbish
sard kar saktī thī be-laus vafāoñ ke charāġh

mujhe sahl ho ga.iiñ manzileñ vo havā ke ruḳh bhī badal ga.e
tirā haath haath meñ aa gayā ki charāġh raah meñ jal ga.e

hukm hai muflisī kā muflis ko
shaam se tū charāġh kar ThanDā

falak ko chāñd-sitāre navāzne vaale
mujhe charāġh jalāne ko sā.ebāñ bhī de

maiñ sāmne se uThā aur lau larazne lagī
charāġh jaise koī baat karne vaalā thā

maiñ raushnī huuñ to merī pahuñch kahāñ tak hai
kabhī charāġh ke nīche bikhar ke dekhūñgī

har ek ghar meñ na jab tak charāġh jal jaa.e
'kamāl' raushan-o-ābād apnā ghar na samajh

koī charāġh na jugnū safar meñ rakkhā gayā
dil-o-dimāġh ko jab apne ghar meñ rakkhā gayā

hone ko hai tulū sabāh-e-shab-e-visāl
bujhne ko hai charāġh-e-shabistān-e-ārzū!

mere gītoñ meñ mohabbat ne jalā.e haiñ charāġh
aur yahāñ zulmat-e-zardār ke ghere haiñ tamām

adū bhī ho sabab-e-zindagī jo haq chāhe
nasīm-e-sub.h hai roġhan charāġh meñ gul ke

din paḌe shola-ruḳhoñ bin mujhe juuñ dūd-e-charāġh
merī dil-sozī se jalte haiñ shab-e-tār ka.ī

tapish gulzār tak pahuñchī lahū dīvār tak aayā
charāġh-e-ḳhud-kalāmī kā dhuāñ bāzār tak aayā