Tags-Charagh

ehsās-e-tīrgī thā use raushnī ke ba.ad
is ḳhauf se charāġh kī lau kāñptī rahī

aa ga.e kyā charāġh āñkhoñ ke
arsh par haiñ dimāġh āñkhoñ ke

koī bazm ho koī anjuman ye shi.ār apnā qadīm hai
jahāñ raushnī kī kamī milī vahīñ ik charāġh jalā diyā

dāġh-e-dil ghuT rahe haiñ piirī meñ
bujh rahe haiñ charāġh mahfil ke

jalā aur jal ke soz-e-rashk se dil bujh gayā fauran
agar hotā charāġh-o-sham.a us mahfil meñ rah jaatā

koī sham.a hai ki jo bujh ga.ī to na.e sire se jalā liyā
ye charāġh dil kā charāġh hai use āñdhiyoñ se bachā.e rakh

maiñ agle jashn meñ chūmūñgā un be-dāġh hāthoñ ko
ki jin hāthoñ ne Dhālā hai charāġh-e-abr miTTī se

āñkheñ mirī kare jo munavvar jamāl-e-yār
ghē ke charāġh tuur ke uupar jalā.ūñ maiñ

jism-e-ḳhākī tujh ko shīshe kī havelī hī sahī
ai charāġh-e-jāñ kabhī fānūs ke bāhar to aa

saare charāġh chhoḌ ke manzil pe baḌh chalā
rasta dikhā rahī hai abhī tīrgī mujhe

ab bhī raushan kiye baiThā hai ummīdoñ ke charāġh
kitnā ma.asūm hai tū kitnā hai saada ai dil

charāġh-o-ā.ina hairān kyuuñ nahīñ hoñge
ki maiñ sabāhat-e-gul kī adā nahīñ samjhā

jo charāġh saare bujhā chuke unheñ intizār kahāñ rahā
ye sukūñ kā daur-e-shadīd hai koī be-qarār kahāñ rahā

dillī suḳhan-varoñ kā hai markaz magar miyāñ
urdu ke kuchh charāġh to punjab meñ bhī haiñ

charāġh-e-uryāñ tan ko bhī bil-āḳhir
havā kā pairahan yaad aa gayā hai

havā kā zor hī kaafī bahāna hotā hai
agar charāġh kisī ko jalānā hotā hai

banā gulāb to kāñTe chubhā gayā ik shaḳhs
huā charāġh to ghar hī jalā gayā ik shaḳhs

tamām laala o gul ke charāġh raushan haiñ
shajar shajar pe shagūfoñ meñ jal rahī hai havā

kabhī to apne badan ke charāġh raushan kar
kabhī to apne lahū se bhī aazmā mujh ko

ye kaun log haiñ jo saare kam ayyāroñ ko
kabhī charāġh kabhī ā.īna batāte haiñ