Tags-Charagh

'atīq' ye hī duā hai ki rahtī duniyā tak
charāg-e-ilm ho raushan ġharīb-ḳhāne meñ

havā ke madd-e-muqābil charāġh rakh denā
mizāj-e-ishq rahā hai ye har zamāne meñ

'maz.har' shab-e-firāq kī zulmat na dhul sakī
ham ne charāġh-e-dāġh jalā.e kahāñ kahāñ

merī miTTī se charāġh-e-dar-o-dīvār banā
dar-ba-dar kar ke mirī ḳhaak mirī izzat rakh

kārvāñ tīra-shab meñ chalte haiñ
āñdhiyoñ meñ charāġh jalte haiñ

milegā manzil-e-maqsūd kā usī ko surāġh
añdherī shab meñ hai chīte kī aañkh jis kā charāġh

shaam aa.ī hai liye haath meñ yādoñ ke charāġh
vo tire saath guzāre hue lamhoñ ke charāġh

ḳhud kā hī nuur kiyā kartā hai raushan dil ko
raushnī tujh ko bhalā kaise deñ ġhairoñ ke charāġh

ek muddat se dhadhaktā rahā merā ye zehn
tab kahīñ jā ke farozāñ hue lafzoñ ke charāġh

zindagī talḳh haqīqat kī hai andhī sī galī
apnī āñkhoñ meñ jalāte raho sapnoñ ke charāġh

laakh tūfān hoñ kuTiyā mirī raushan hī rahī
ek barsāt se bujhne lage mahloñ ke charāġh

ab to jamhūr kī tāqat kā hī sūraj hai 'sahāb'
ab zamāne meñ kahāñ jalte haiñ shāhoñ ke charāġh

mere is ghar meñ añdherā kabhī hotā hī nahīñ
haiñ mire siine meñ jalte hue zaḳhmoñ ke charāġh

saarī duniyā ko ḳhudā ek hī sūraj de de
kaash bujh jaa.eñ zamāne se ye firqoñ ke charāġh

lipaT rahī hai fasīl kī burjiyoñ se ik shahr kī nigāheñ
aur ek dīvār-e-ā.īna par jhukā huā hai charāġh merā

nahīñ hai is niiñd ke nagar meñ abhī kisī ko dimāġh merā
magar kisī ḳhvāb ke safar meñ sipar kareñge charāġh merā

banā ke toḌtī hai dā.ere charāġh kī lau
bahā ke le ga.ī mujh ko kahāñ shu.ūr kī rau

shab-e-darāz kā hai qissa muḳhtasar 'kaifī'
huī sahar ke ujāloñ meñ gum charāġh kī lau

āñdhī ne raushnī kī himāyat to kī bahut
lekin koī charāġh jalāne nahīñ diyā

gul huā koī charāġh-e-saharī o bulbul
haath maltī huī pattoñ se sadā aatī hai