Tags-Charagh

tirā charāġh sar-e-shām bujh gayā lekin
sahar ke bhes meñ phaileñgī us kī tanvīreñ

muntazir haiñ sab havā ke chāñd chehre aur charāg
dekhiye ye kyā bujhā de aur kyā raushan kare

usī ne chāñd ke pahlū meñ ik charāġh rakhā
usī ne dasht ke zarroñ ko āftāb kiyā

gul charāġh-e-dair hai ḳhāmosh hai sham-e-haram
sāqiyā raushan hai tere dam se mai-ḳhāna abhī

charāġh jalte haiñ kyuuñ rāt-bhar mire dil meñ
bahut dinoñ se agar is makāñ meñ koī nahīñ

sabhī charāġh añdheroñ se mil ga.e lekin
harīf-e-mauj-e-havā ik diyā abhī tak hai

vo qalb-gāh-e-tamannā meñ ik charāġh kī lau
ko tez rakhtā thā nazr-e-havā na kartā thā

unhīñ gharoñ se ibārat hai apnī shām-e-jahāñ
charāġh-e-tāq bhī aksar jalā na kartā thā

nikal ke dekho haram se bahār duniyā kī
ki but-kade meñ hazāroñ charāġh jalte haiñ

vo aur bazm hai jis meñ charāġh jalte haiñ
yahāñ to apne hī dil aur dimāġh jalte haiñ

safā.ī dil kī kahāñ qadr-e-tīra-rozī meñ
charāġh-e-sub.h hai shab-hā-e-tār ā.īna

kabhī hameñ bhī milāo to aise logoñ se
ki jin kī aañkh meñ ab tak charāġh jalte haiñ

mauj-e-havā se kaañp gayā ruuh kā charāġh
sail-e-sadā meñ Duub ga.ī yaad kī dhanak

koī kalīm uThe varna intizār ke ba.ad
charāġh-e-tūr-e-mohabbat bujhā rahā hai koī

kuchh is tarah se tasavvur meñ aa rahā hai koī
charāġh ruuh meñ jaise jalā rahā hai koī

ḳhabar rihā.ī kī mil chukī hai charāġh phūloñ ke jal rahe haiñ
magar baḌī tez raushnī hai qafas kā dar sūjhtā nahīñ hai

ye shikāyat-e-dar-o-bām kyā ye rabāt-e-kohna kī raat kyā
koī be-charāġh shab-e-vafā tire shahr meñ bhī guzar ga.ī

zamīñ ne kar liyā kyā tīrgī se samjhautā
ḳhayāl chhoḌ chuke kyā charāġh jalne kā

charāġh-e-sub.h ye kahtā hai āftāb ko dekh
ye bazm tum ko mubārak ho ham to chalte haiñ

vo chāñdnī meñ jo Tuk sair ko nikalte haiñ
to mah ke tasht meñ ghī ke charāġh chalte haiñ