Tags-Charagh

jo ho yaqīn to bas ik charāġh kaafī hai
na ho to laakh mah-o-mehr rā.egāñ ho jaa.eñ

huī jo shaam to dil meñ udāsiyāñ utrīñ
charāġh jalne lage haiñ to bujh gayā huuñ maiñ

jagmagāte hue jugnū na ziyāñ hotā charāġh
raat meñ kuchh bhī na thā jis ko kaheñ raat sā thā

ab kisī raah pe jalte nahīñ chāhat ke charāg
tū mirī āḳhirī manzil hai mirā saath na chhoḌ

vahāñ havāoñ ke ruḳh bhī nigāh meñ rakhnā
jahāñ charāġh jalāte ho raushnī ke liye

kamāl jab hai ki us raah meñ charāġh jalāo
jo muddatoñ se tarastī hai raushnī ke liye

añdherī raat aur us par mire charāġh kā zo.am
ujaḌtī bazm ko ābād karne vaalā huuñ

qarīb-e-āḳhir-e-shab ḳhatm ho ga.ī mahfil
aur is ke saath dhuāñ bhī charāġh meñ aayā

nayā ḳhayāl kabhī yuuñ dimāġh meñ aayā
ki shola chaltā huā ḳhud charāġh meñ aayā

ghar ke charāġh aur bhī be-nūr ho ga.e
is darja ḳhātir-e-mah-o-ḳhurshīd kī ga.ī

ye aag aur nahīñ dil kī aag hai nādāñ
charāġh ho ki na ho jal-bujheñge parvāne

charāġh ab shab-e-vasl jalne na deñge
vo gesū jo bal khā ke kaale hue haiñ

mujhī par qat.a huī hai qabā-e-dil-sozī
havā se aa ke chhupe mere pairahan meñ charāġh

ḳhudā-e-bartar ne āsmāñ ko zamīn par mehrbāñ kiyā hai
magar mire ḳhvāb ke nagar ko charāġh ne ḳhush-gumāñ kiyā hai

sitār-e-ḳhvāb se bhī baḌh kar ye kaun be-mehr hai ki jis ne
charāġh aur aa.ine ko apne vajūd kā rāz-dāñ kiyā hai

añdherī shab meñ bhī tāmīr-e-āshiyāñ na ruke
nahīñ charāġh to kyā barq to chamaktī hai

havā ke ruḳh pe liye baiThā huuñ charāġh apnā
mire ḳhudā ne mujhe baḳhsh dī amaañ kaisī

mirī tārīk hastī meñ na jaane
charāġh-e-ārzū kis ne jalāyā

duur hote jā rahe the sāhiloñ par do charāġh
bādbāñ ne rakh liyā thā aks bhī ik baat kā

to ek thā mire ash.ār meñ hazār huā
us ik charāġh se kitne charāġh jal uThe