Tags-Charagh

'nayyar' ho aaise daur meñ kyā raushnī kī baat
bin tel kā charāġh liye phir rahā huuñ maiñ

Dar hai ki tīrgī meñ qadam Dagmagā na jaa.e
ik shahr-e-be-charāġh liye phir rahā huuñ maiñ

charāġh-e-hujra-e-jāñ kī ḳhabar lo
laboñ par aa gayā hai dam azīzam

na.e charāġh na.ī raushnī atā karte
agar purāne diye un se kuchh vafā karte

duur ik charāġh-e-kushta paḌā hai zamīn par
shāyad sitam kī raat kā Derā vahīñ se hai

agar charāg kī lau par zabān rakh detā
zabān jaltī bhī kab tak charāg jalne tak

na ḳhizāñ meñ hai koī tīrgī na bahār meñ koī raushnī
ye nazar nazar ke charāġh haiñ kahīñ bujh ga.e kahīñ jal ga.e

jo thake thake se the hausle vo shabāb ban ke machal ga.e
jo nazar nazar se gale milī to bujhe charāġh bhī jal ga.e

jo naqsh naqsh-e-mohabbat thā miT chukā dil se
charāġh ab ye kisī tāqche meñ rakh denā

ishq ke hāthoñ charāġh ek sar-e-shām aayā
tīra-baḳhtī meñ mirā dil hī mire kaam aayā

ġhair ke haath meñ āzādī-e-raushan kā charāġh
maiñ faqat murda charāġhoñ kā dhuāñ rakhtā huuñ

charāġh ghar kā ho mahfil kā ho ki mandir kā
havā ke paas koī maslahat nahīñ hotī

apnī hī rahguzar ke bujhātā hai kyuuñ charāġh
har rāste se merā guzarnā muhāl kar

har raushnī 'sirāj' charāġh-e-haram nahīñ
is sat.h par nigāh ko laa.eñ to kyā kareñ

charāġh-e-kohna haTātā fasīl-e-murda se
giyāh-e-ḳhām pe shabnam dabīz-tar kartā

saañs roko charāġh gul kar do
aaj badlegī chāñdnī cholī

sūraj to sirf din ke ujāle kā hai imaam
ham haiñ charāġh laḌte haiñ tīra-shabī se ham

havā kī dostī achchhī na dushmanī achchhī
charāġh pahle na thā ab hai ham-ḳhayāl mirā

charāġh jalne lageñge tumhārī rāhoñ meñ
jo dūsroñ ke gharoñ meñ diye jalāo.ge

charāġh haiñ āsmāñ ke ThanDe vo bijliyāñ sard paḌ ga.iiñ sab
na ab vo tūfān-e-rañg-o-bū hai na ab chaman hai na āshiyāñ hai