Tags-Charagh

duniyā se dāġh-e-zulf-e-siyah-fām le gayā
maiñ gor meñ charāġh-e-sar-e-shām le gayā

maiñ dar-ba-dar thā magar bhuul bhuul jaatā thā
ki ik charāġh darīche meñ jāgtā bhī hai

kisī bādbān kī oT meñ kahīñ āsmān ke sāmne
ye ziyā hai mish.al-e-ḳhvāb kī ki koī charāġh hai abr kā

mire aa.ine se judā huā jo charāġh-e-hijr to ye khulā
chaman-e-sitāra-o-rañg meñ bhī kahīñ qayām hai abr kā

kisī ne shāne pe haath rakh kar jo naam pūchhā 'matīn' apnā
charāġh āñkhoñ meñ jal-bujhe haiñ vajūd saarā pighal rahā hai

sarāb-andar-sarāb tum ho charāġh-andar-charāġh ham haiñ
hamīñ se tārīkiyāñ haiñ ḳhā.if hamīñ se ḳhurshed jal rahā hai

havā bahut tez chal rahī hai charāġh-e-jāñ phir bhī jal rahā hai
ye kaun hai jo hamāre pīchhe havā ke hamrāh chal rahā hai

mizāj le ke bil-āḳhir judā kidhar jaa.e
charāġh-e-dost bane haiñ havā kidhar jaa.e

nigāh paḌtī hai phir kyuuñ parā.ī sham.oñ par
agar aziiz hai 'mohsin' charāġh-e-ḳhāna hameñ

havā-e-sub.h-e-dil-āzār itnī tez na chal
charāġh-e-shām-e-ġharībāñ haiñ ham bujhā na hameñ

sar-phirī havāoñ se ḳhauf khā nahīñ sakte
jin charāġh-zādoñ ko āñdhiyoñ ne paalā hai

ab maiñ ik jalva-e-be-rañg kā shaidā.ī huuñ
har charāġh-e-haram-o-dair bujhā rakkhā hai

ik din havā ke ḳhauf se kahne lagā charāġh
merā yuuñ shā.irī meñ na charchā kareñ huzūr

maiñ ḳhud bhī Duub rahā huuñ har ik sitāre meñ
ki ye charāġh mire hasb-e-hāl se kuchh haiñ

ġharīb-ḳhāne meñ hotī hai raushnī jis se
ham us charāġh-e-munavvar ko chuum lete haiñ

aTā hai dhuul se kamra hai taaq bhī suunā
kabhī gulāb saje the charāġh jaltā thā

koī charāġh bhī raḳht-e-safar meñ rakh lete
safar meñ raat bhī aa.egī ye na sochā thā

nahīñ laḳht-e-jigar ye chashm meñ phirte ki mardum ne
charāġh ab kar ke raushan chhoḌe haiñ do-chār paanī meñ

bujhā hai dil to na samjho ki bujh gayā ġham bhī
ki ab charāġh ke badle charāġh kī lau hai

ḳhizāñ kī raat ke qātil kahāñ ga.e dekheñ
ki jo lahū hai charāġh-e-bahār kī lau hai