Tags-Charagh

vo tīra-baḳht huuñ ki 'hasan' merī bazm meñ
dāġh-e-siyah charāġh hai aur duud āh-e-sham.a

bujhā rakhe haiñ ye kis ne sabhī charāġh-e-havas
zarā sā jhāñk ke dekheñ kahīñ havā hī na ho

nahīñ ki shorish-e-bazm-e-tarab fuzūñ bhī nahīñ
dalīl-e-shorish-e-jāñ ik charāġh-e-ḳhūñ bhī nahīñ

jo thake thake se the hausle vo shabāb ban ke machal ga.e
vo nazar nazar se gale mile to bujhe charāġh bhī jal ga.e

na ḳhizāñ meñ hai koī tīrgī na bahār meñ koī raushnī
ye nazar nazar ke charāġh haiñ kahīñ bujh ga.e kahīñ jal ga.e

charāġh āñkhoñ ke vīrān hote jaate haiñ
tumhārī raah se uThtī nahīñ nazar phir bhī

zid ye thī vo jalegā tumhāre hī haath se
us zid ne ek charāġh ko jalne nahīñ diyā

havā yūñhī nahīñ aatī hai ġhusse meñ 'sīmā'
charāġh koī kahīñ par to jal rahā hogā

maiñ naqsh-e-hijr-e-yār huuñ shab kī fasīl par
jaltā huā charāġh banāyā gayā mujhe

charāġh-e-shauq pe rah rah ke nuur aatā hai
havā ba-tarz-e-ruḳh-o-chashm-o-lab pukārtī hai

charāġh-e-dard ki sham-e-tarab pukārtī hai
ik aag sī lab-e-dariyā-e-shab pukārtī hai

charāġh huuñ mujhe jab dhuup raas aa na sakī
to ḳhud sikoḌ liyā apnā dā.era maiñ ne

maiñ kahīñ bhī huuñ magar huuñ usī mahfil kā charāġh
vo jahāñ bhī ho mire dil kā makīñ lagtā hai

kisī añdhere ko ḳhātir meñ tum nahīñ laanā
mirā charāġh ba-hadd-e-kamāl raushan hai

use añdheroñ kī pahchān kyā huī logo
charāġh jis kā havāoñ ke darmiyāñ na gayā

kiyā raushan charāġh-e-dil kuuñ mere
'sirāj' ab fazl-e-rahmānī yahī hai

guzar rahī hai ajab tarah zindagī 'ālī'
na bujh rahā hai charāġh aur na jal rahā hai charāġh

lamhoñ kā ġhubār chhā rahā hai
yādoñ ke charāġh jal rahe haiñ

munfa.il haiñ laala o sham.a o charāġh
ham ne bhī kyā āshiqī meñ khaa.e daaġh

anjām aarzū kā burā hai bas is liye
dil meñ kabhī charāġh ye jalne nahīñ diyā