Tags-Charagh

jal uThā ik charāġh-e-shām to kyā
bujh ga.e be-shumār imkānāt

bujhā ga.ī thī kabhī jis ko be-ruḳhī terī
usī charāġh ko phir se jilā liyā nai

malāl-e-dil se ilāj-e-ġham-e-zamāna kiyā
ziyā-e-mehr se raushan charāġh-e-ḳhāna kiyā

charāġh kī oT meñ rukā hai jo ik hayūlā sā yāsmīñ kā
ye rañg hai aur āsmāñ kā ye phuul hai aur hī zamīñ kā

kahīñ koī charāġh jaltā hai
kuchh na kuchh raushnī rahegī abhī

ye charāġh-e-anjuman to haiñ bas ek shab ke mehmāñ
tū jalā vo sham.a ai dil jo bujhe kabhī na jal ke

aate jaate din kyā kahte haiñ sun
ilm ke chāñd charāġh se sāthī

sannāTe kā aalam qabr meñ hai hai ḳhvāb-e-adam ārām nahīñ
imkān-e-numūd-e-sub.h nahīñ ummīd-e-charāġh-e-shām nahīñ

mirī nazar bhī añdheroñ se uub saktī hai
koī charāġh to yaaro jalā huā rakhnā

ka.ī charāġh haiñ raushan fasīl-e-shab pe magar
ka.ī charāġhoñ ko taaza havā na raas aa.ī

charāġh le ke hathelī pe ghūmnā aise
havā-e-tund ko apne ḳhilāf karnā hai

tamām laala o gul ke charāġh raushan haiñ
shajar shajar pe shagūfoñ meñ jal rahī hai havā

ik terā aasrā hai faqat ai ḳhayāl-e-dost
sab bujh ga.e charāġh shab-e-intizār meñ

ek mailī dukān tiira o taar
ik charāġh aur ek doshīza

jo maujeñ ḳhaas kar chashm-o-charāġh-e-dām-e-tūfāñ haiñ
maiñ un maujoñ ko ham-āġhosh-e-sāhil dekh letā huuñ

usī ufuq se nayā āftāb ubhregā
jahāñ charāġh jalāyā thā kuchh dinoñ pahle

muskurāne lage har samt mohabbat ke charāġh
tere chehre kā tasavvur bhī baḌe kaam kā hai

āñdhiyāñ aatī haiñ gul karne ko 'ehsās' bahut
jhilmilātā huuñ charāġh-e-tah-e-dāmāñ kī tarah

mire dard kī haqīqat koī mere dil se pūchhe
ye charāġh vo hai jis se mire ghar meñ hai ujālā

jaltā huā charāġh agar hai mirā vajūd
phir apne dil ke taaq meñ jalne to de mujhe