Tags-Charagh

jalāne vaale jalāte hī haiñ charāġh āḳhir
ye kyā kahā ki havā tez hai zamāne kī

baj uThā sāz-e-tarab aur jal uThe dil ke charāġh
ittifāqan bhī agar un se nazar Takrā ga.ī

sahar bhī hogī nasīm-e-sahar bhī gā.egī
magar ye raat mohabbat charāġh zahr ke jaam

sab ik charāġh ke parvāne honā chāhte haiñ
ajiib log haiñ dīvāne honā chāhte haiñ

kahāñ charāġh jalā.eñ kahāñ gulāb rakheñ
chhateñ to miltī haiñ lekin makāñ nahīñ miltā

charāġh jalte hī bīnā.ī bujhne lagtī hai
ḳhud apne ghar meñ hī ghar kā nishāñ nahīñ miltā

pūchhā jo maiñ ne yaar se anjām-e-soz-e-ishq
shoḳhī se ik charāġh ko us ne bujhā diyā

zamīñ ko mil ke sañvāreñ misāl-e-rū-e-nigār
ruḳh-e-nigār se raushan charāġh-e-bām kareñ

na.e daur ke na.e ḳhvāb haiñ na.e mausamoñ ke gulāb haiñ
ye mohabbatoñ ke charāġh haiñ inheñ nafratoñ kī havā na de

mire dil kī raakh kured mat ise muskurā ke havā na de
ye charāġh phir bhī charāġh hai kahīñ terā haath jalā na de

vahāñ charāġh jalātā huuñ zindagī kā 'ashk'
jahāñ havā ke liye rāsta nahīñ hotā

kis ke liye charāġh jalā.eñ tamām raat
'nāsik' phir ehtimām-e-sahar kis liye kareñ

maiñ bhī raushan dimāġh rakhtā huuñ
chāñd jaisā charāġh rakhtā huuñ

ik intizār meñ qaa.em hai is charāġh kī lau
ik ehtimām meñ kamre kā dar khulā huā hai

charāġh-e-intizār aisī nigahbānī ke aalam meñ
muñDeroñ par nahīñ jalte to phir palkoñ meñ aate haiñ

bujhte hue charāġh kī lau jis ne tez kī
vo aur hī havā hai mirī jaan tum nahīñ

ye mo.ajiza hayāt kā ma.amūl ban gayā
itnī dafa charāġh havāoñ se laḌ ga.e

tū bhī ruḳhsat ho rahā hai dhuup bhī Dhalne ko hai
mere andar ik charāġh-e-shām-e-ġham jalne ko hai

ye shaam marg-e-tamannā kī shaam hai 'sādiq'
koī charāġh kisī tāq-e-chashm par na jale

charāġh-e-shahr nahīñ ham charāġh-e-sahrā haiñ
kise ḳhabar ki jale aur kise ḳhabar na jale