Tags-Charagh

ġhurūr tund havāoñ kā yuuñ bhī toḌā hai
charāġh haath pe rakh kar guzar ga.e haiñ log

havā ko aur bhī kuchh tez kar ga.e haiñ log
charāġh le ke na jaane kidhar ga.e haiñ log

kahīñ charāġh kahīñ ā.īna kahīñ ḳhushbū
ravāñ hai koī ajab qāfila daraḳhtoñ meñ

kiran kiran ye kisī dīda-e-hasad meñ hai
har ik charāġh hamārā dhueñ kī zad meñ hai

hijr o visāl charāġh haiñ donoñ tanhā.ī ke tāqoñ meñ
akasr donoñ gul rahte haiñ aur jalā kartā huuñ maiñ

jhijhak kar kisī ne churā.īñ jo nazreñ
charāġh-e-tamannā lagā jhilmilāne

mere aur us ke beach shab-e-āḳhirīñ kā daaġh
ik āḳhirī charāġh hai jal kyuuñ nahīñ rahā

havā to apnā qarīna badal nahīñ saktī
charāġh aap ne kis zo.am meñ jalā.e the

ek diyā ākāsh meñ 'bānī'
ek charāġh sā peshānī meñ

kyuuñ hamāre qabze meñ koī jin nahīñ aatā
is charāġh-e-hastī ko ham bhī to ragaḌte haiñ

aa.iye charāġh-e-dil aaj hī jalā.eñ ham
kaisī kal havā chale koī jāntā nahīñ

turbat pe dil-jaloñ kī nahīñ gar charāġh o gul
siine meñ sozish-e-dil o dāġh-e-jigar to hai

maiñ chashm-e-pur-nam kī mish.aloñ se charāġh-e-fardā jalā rahā huuñ
ki naqsh-e-irfān-o-āgahī bhī 'zafar' mirī ḳhaak meñ milegā

mere anfās kī lau se nahīñ mahfil raushan
ik charāġh-e-tah-e-dāmāñ huuñ hamesha kī tarah

vo aa rahe haiñ koī kah rahā hai kānoñ meñ
charāġh diid kā ham to bujhā.e baiThe haiñ

na jaane kis ghaḌī aa jaa.eñ DhūñDte ham ko
charāġh din meñ bhī dar par jalā.e baiThe haiñ

unhīñ tārīk rāhoñ se guzarnā hai tumheñ 'ādil'
charāġh-e-jāñ jalā kar tum bilā ḳhauf-o-ḳhatar jaanā

log kahte rahe sūraj ko dikhā.eñge charāġh
aur hī rañg thā jab sāmne aayā sūraj

use bhī raat ga.e be-charāġh honā hai
hameñ bhī chauk meñ kuchh intizār karnā hai

kyā ḳhabar thī sub.h ho jā.egī tere nuur se
shaam se merā charāġh-e-ḳhāna ruḳhsat māñgtā