Tags-Charagh

jī letī hai vo zulf-e-siyah-fām hamārā
bujhtā hai charāġh aaj sar-e-shām hamārā

shab-e-firāq achānak ḳhayāl aayā mujhe
ki maiñ charāġh na thā us ne kyuuñ jalāyā mujhe

lahū kā qatra thā vo bhī jo apnī gardish meñ
kahīñ charāġh banā aur kahīñ sitāra huā

ye kab tak sard lāsheñ be-hisī ke barf-ḳhānoñ meñ
charāġh-e-dard se raushan shabistānoñ meñ aa jaao

charāġh agarche numā.inde raushnī ke haiñ
magar ye hai ki ye āsār tīrgī ke haiñ

masrūfiyat ziyāda nahīñ hai mirī yahāñ
miTTī se ik charāġh banānā hai aur bas

maiñ bujh rahā huuñ magar merī raushnī 'shahzād'
charāġh-e-ḳhema-e-idrāk se ziyāda hai

charāġh le ke phirā DhūñDhtā huā ghar ghar
shab-e-firāq jo mujh ko rahī sahar kī talāsh

maiñ iztirāb meñ huuñ shaam se sahar ke liye
koī charāġh atā kar de rāt-bhar ke liye

tamām-umr añdhere meñ kaT ga.ī yārab
koī charāġh atā kar hamāre ghar ke liye

hai zo.am-e-sho.ala to dekhe havā-e-dard kā zor
charāġh hai to sar-e-rahguzār aa.e koī

charāġh ho gayā bad-nām kuchh ziyāda hī
ki jal rahā thā sar-e-bām kuchh ziyāda hī

charāġh-e-ārzū kī lau bhaḌakne de abhī 'farhat'
vahī tanhā shab-e-furqat meñ hogā ham-safar terā

ham agar dil na jalāte to na jalte ye charāġh
ham na rote jo lahū aa.ine meñ patthar hote

mire saath jugnū hai ham-safar magar is sharar kī bisāt kyā
ye charāġh koī charāġh hai na jalā huā na bujhā huā

har ek moḌ pe jalte haiñ ġhurbatoñ ke charāġh
qadam qadam pe nayā ġham hai tum na saath chalo

mire charāġh kī lau se musābqat kaisī
mujhe usī pe urūj-o-zavāl rakhnā hai

mire ḳhayāl kī lau ko bujhāne vāloñ ne
charāġh-e-rāh samajh kar jalā diyā hai mujhe

maiñ ḳhud hī bujhne lagtā huuñ jalte hue charāġh
jis roz terī lau se mirī guftugū na ho

jalte bujhte charāġh sā dil meñ
ārzūoñ kā silsila aa.e