Tags-Charagh

phīkā phīkā hai mirī bazm-e-mohabbat kā charāġh
tum jo aa jaao to kuchh raunaq-e-mahfil ho jaa.e

vafā kī manziloñ ko ham ne is tarah sajā liyā
qadam qadam pe ik charāġh-e-ārzū jalā liyā

maiñ us ke intizār meñ khoī kuchh is tarah
āñkheñ huiiñ charāġh to ghar thā diyā diyā

vo daaġh jis ko jagah dil meñ dī thī jīte-jī
charāġh bhī to hamāre mazār kā na huā

vo jhiil jhiil meñ jhurmuT na the sitāroñ ke
charāġh the ki jo chāñdī kī thāliyoñ meñ jale

jo bārishoñ meñ jale tund āñdhiyoñ meñ jale
charāġh vo jo bagūloñ kī chimniyoñ meñ jale

ajnabī āñkhoñ meñ mānūs vafāoñ kā charāġh
ek ummīd pe jaltā rahā ghup rātoñ meñ

jis se saare charāġh jalte the
vo charāġh aaj kuchh bujhā sā thā

masāfat-e-umr meñ ziyāñ kā hisāb hotā hai justujū se
magar maiñ duniyā ko dekhtā huuñ charāġh aur aa.ine kī rū se

fasīl-e-ishq pe rakkhā huā charāġh huuñ maiñ
havā-e-hijr kā rahtā hai intizār mujhe

tum ne ma.abad dekhe hoñge ye āñgan hai yahāñ
ek charāġh bhī jaltā rakhnā kitnā mushkil hai

sub.h kā vaqt aa.e to ḳhud hī bujhegā ye charāġh
is ko sahar se peshtar koī magar bujhā.e kyuuñ

vo raat be-panāh thī aur maiñ ġharīb thā
vo jis ne ye charāġh jalāyā ajiib thā

havā kī zad pe charāġh-e-shab-e-fasāna thā
magar hameñ bhī usī se diyā jalānā thā

sab kī dahlīz pe jalte haiñ ta.assub ke charāġh
kyā karegā koī aise meñ hifāzat ghar kī

kyuuñ sajā letā hai palkoñ pe ye ashkoñ ke charāġh
ai havā kuchh to batā phuul se rishta kyā he

un se havā pe naqsh huī naġhmagī 'naved'
jitne bhī the charāġh hamāre dhare hue

ai āftāb tirī zulmat-e-judā.ī meñ
'sirāj' āh-e-sahar kuuñ charāġh-e-shām kiyā

udhar charāġh bujhāne ko hai havā betāb
idhar ye zid ki havāoñ meñ jal ke dekhte haiñ