Tags-Charagh

javān lau pe na jaa, nau-damīda zau pe na jā
charāġh-e-va.ada hai, jaltā ye umr bhar koī hai

maiñ ne kabhī bhī raat se shikva nahīñ kiyā
har shab kisī charāġh sā jal kar baḌā huā

ghar se juuñ māh-e-be-hijāb nikal
ab to ai sham.a-rū charāġh lagā

ātishīñ ashk ek dam jo thamā
ḳhāna-e-dīda be-charāġh lagā

ek kitāb sirhāne rakh dī ek charāġh sitārā kiyā
mālik is tanhā.ī meñ tū ne kitnā ḳhayāl hamārā kiyā

mire suḳhan meñ jo ik lau sī thartharātī hai
charāġh-e-shab se mirā bhī mukālima rahā hai

jahāñ pe dekhe qadam apne kuchh bhaTakte hue
vahīñ Thahar ke farozāñ charāġh-e-bāda kiyā

vo ek ḳhvāb ki āñkhoñ meñ jagmagā rahā hai
charāġh ban ke mujhe raushnī dikhā rahā hai

tujh ko to havāoñ kī zad meñ kuchh raat ga.e tak jalnā hai
ik ham ki tire jalte jalte bastī se charāġh-e-shām chale

kis kī tanvīr se jal uTThe basīrat ke charāġh
kis kī tasvīr ye āñkhoñ se lagā.ī ga.ī hai

'mohsin' na jaane sub.h numūdār hogī kab
ye shām-e-be-charāġh hī taqdīr ho na jaa.e

sab ik charāġh ke parvāne honā chāhte haiñ
ajiib log haiñ dīvāne honā chāhte haiñ

hai jahāñ meñ jin se raushan adl ke ghar kā charāġh
dam-ba-dam un bādshāhān-e-jahāñ ko ishq hai

aaj phir bujh ga.e jal jal ke umīdoñ ke charāġh
aaj phir tāroñ bharī raat ne dam toḌ diyā

mere lahū meñ jal uThe utne hī tāza-dam charāġh
vaqt kī sāzishī havā jitne diye bujhā ga.ī

maiñ huuñ ḳhvāboñ kī havā tū hai haqīqat kā charāġh
paas hoñ donoñ to is meñ bhī ḳhasāra hai bahut

ai barhaman ik din but-e-pindār ko apne
toḌ aur charāġh-e-dar-e-but-ḳhāna banā de

yuuñ lag rahā hai jaise abhī lauT aa.egā
jaate hue charāġh bujhā kar nahīñ gayā

vo kārvān-e-shab kā huā āḳhirī charāġh
lo shaiḳh ko ye mansab-e-mumtāz to milā

hājat charāg kī hai kab anjuman meñ dil ke
mānind-e-sham.a raushan har ek ustuḳhvāñ hai