Tags-Charagh

tā-sub.h jhilmilā.ī mire āñsūon meñ shab
bujhtā huā charāġh sitāroñ se bhar gayā

ai jān-e-kā.enāt tire intizār meñ
ham ne ka.ī charāġh jalā.e bujhā.e haiñ

jal uThe zehn ke aivān meñ lafzoñ ke charāġh
aaj phir garmi-e-andāz-e-bayāñ raqs meñ hai

har aarzū ke hoñT zamāne ne sī diye
bujhne lagā charāġh sar-e-shām kyā kareñ

shaam hī tak thā sukūt-e-qabl-e-tūfāñ phir na pūchh
kaise kaise ham charāġh-e-shab sahar tak le ga.e

dastakeñ detā thā akasr shaam kā ThanDā charāġh
aur ye dastak kisī ke lauT kar aane kī thī

vo ḳhvāb dekh rahī thiiñ ye jāgtī āñhkeñ
charāg ḳhud nahīñ bujhtā to maiñ bujhā detā

chup-chāp ḳhalvatoñ meñ pighalne se fā.eda
koī charāġh hai to sar-e-anjuman bhī lā

samāñ ab aa gayā sone kā ġhāliban 'ḳhurshīd'
charāġh shaam ke ghar ghar bujhā.e jaate haiñ

jab un kī bazm meñ pahuñche to ye huā ma.alūm
yahāñ charāġh nahīñ dil jalā.e jaate haiñ

charāġh jalte nahīñ haiñ jalā.e jaate haiñ
ye ashk bahte nahīñ haiñ bahā.e jaate haiñ

lahad meñ kyā zikr raushnī kā sar-e-lahad bhī jo rahm khā kar
jalā kiyā jab charāġh koī havā ne ThanDā kiyā bujhā kar

ye kyā kiyā mujhe merī nazar se chhīn liyā
usī lahū se charāġh-e-vajūd jaltā thā

buland kar ke zarā hausloñ kī dīvāreñ
diyā jalā ke havā ko charāġh-pā rakhnā

charāġh us ne bujhā bhī diyā jalā bhī diyā
ye merī qabr pe manzar nayā dikhā bhī diyā

bhaTak rahī hai añdhere meñ zindagī kī barāt
koī charāġh sar-e-rahguzar jalātā jā

bujh ga.e tahzīb-e-nau ke sab charāġh
ek miTTī kā diyā jaltā rahā

vo charāġh-e-zīst ban kar raah meñ jaltā rahā
haath meñ vo haath le kar umr bhar chaltā rahā

uTho jalā ke mai-e-surḳh se charāġh-e-abad
nashāt-e-sohbat-e-shab ko hazār-sāla kareñ

ham sar-e-shām jalāte haiñ tasavvur ke charāġh
kaun dekhegā tirī raah sahar hone tak