Tags-Charagh

mirī lahad pe na raushan kare charāġh koī
ye vo jagah hai jahāñ āftāb utreñge

yahāñ kisī ne charāġh-e-vafā jalāyā thā
tabhī ye ġham-kada-e-dil bhī jagmagāyā thā

dil se us rashk-e-charāġh-e-harm-o-dair ke ba.ad
hai vahī vahshat-e-tārīkī-e-ma.abad kī nahīñ

afsurda yuuñ huā dil-e-sozāñ ko uf na kī
aisā bujhā dhuāñ bhī na niklā charāġh se

ik dāġh-e-dil ne mujh ko diye be-shumār daaġh
paidā hue hazār charāġh is charāġh se

dīdār-e-ruḳh nasīb huā dil ke daaġh se
sūraj ko maiñ ne DhūñDh liyā is charāġh se

dil ko huā hai ishq mohabbat ke daaġh se
parvāna lau lagā.e hue haiñ charāġh se

'nātiq' diloñ meñ nuur hai is sham-e-husn kā
raushan hai sab ke ghar kā charāġh is charāġh se

maiñ charāġh-e-hasrat-e-nīm-shab meñ sharār-e-ātish-e-jāñ-ba-lab
dil-e-pur-umīd kī lau thā maiñ mujhe ḳhud vo aa ke bujhā gayā

ziyāda ḳhauf-e-rusvā.ī nahīñ hai soz-e-pinhāñ meñ
dhuāñ hotā hai lekin kam charāġh-e-zer-e-dāmāñ meñ

dil meñ vo aa ke hasrat-o-armāñ jagā ga.e
ummīd ke charāġh jalā kar bujhā ga.e

shab-e-ġham yaad un kī aa rahī hai
charāġh-e-dil kī lau tharrā rahī hai

bachā ke rakkhā hai ab tak charāġh kī lau ko
magar havā hai havā par dabāo mushkil hai

nasīb apnā zarā aazmā ke dekheñge
charāġh-e-shauq havā meñ jalā ke dekheñge

charāġh baḳhshe ga.e shahr-e-be-basārat ko
ye kār-e-ḳhair bhī sarzad huā ajab tum se

charāġh hai mirī rātoñ kā ek ḳhvāb-e-visāl
jo koī pal tirī chashm-e-siyāh meñ aayā

azal se tīra-baḳht-e-ishq ke hisse meñ aayā hai
shab-e-ġham-e-dil kā jal jal kar charāġh-e-tūr ho jaanā

vo ik makān ki us meñ koī nahīñ rahtā
magar charāġh se jalte dikhā.ī dete haiñ

ise charāġh kā rutba kahūñ yā ro.ab kahūñ
havā ke par mirī dahlīz par simaTne lage

charāġh kartā huuñ apnā har ek azv-e-badan
taras gayā huuñ ġham-e-lā-zavāl dekhne ko