Tags-Charagh

tamām raat bujheñge na mere ghar ke charāġh
ki ye charāġh haiñ ḳhūn-e-dil-o-jigar ke charāġh

ye lāl-qil.a ye dīvār-e-chīñ ye tāj-mahal
ye sab ke sab haiñ jalā.e hue bashar ke charāġh

is anjuman meñ ujālā rahegā sadiyoñ tak
jalā rahā huuñ musalsal dil-o-nazar ke charāġh

unhīñ pe chalne se manzil milegī ham-safaro
ye naqsh-e-pā haiñ kisī ke ki rahguzar ke charāġh

huā na aisā charāġhāñ kabhī sar-e-maqtal
hatheliyoñ pe haiñ raushan burīda-sar ke charāġh

mere andāze kī nisbat vo charāġh
kam jalā thā phir bhī achchhā jal gayā

yaqīn hogā hameñ ab tumhāre hone kā
lo ham ne uñgliyāñ jalte charāġh par rakh diiñ

kahīñ mohabbat ke āsmāñ par visāl kā chāñd Dhal rahā hai
charāġh ke saath tāqche meñ gulāb kā phuul jal rahā hai

abhī rakhī bhī nahīñ lau charāġh par maiñ ne
lipaT ga.e ka.ī parvāne mere kāġhaz se

vo saath thā to manzileñ nazar nazar charāġh thiiñ
qadam qadam safar meñ ab koī bhī lab duā nahīñ

jal uThe haiñ sar-e-mizhgāñ tirī ḳhushbū ke charāġh
ab ke ḳhvāboñ kī ajab fasl huī hai mujh meñ

yād-e-lab-e-jānāñ hai charāġh-e-dil-e-ranjūr
raushan hai ye ghar aaj usī la.al-e-yamanī se

pāgal sī ik sadā kisī ujḌe makāñ meñ thī
khiḌkī meñ ik charāġh bharī-dopahar meñ thā

huuñ tā.ir-e-be-bām charāġh-e-sar-e-sahrā
ummīd-e-karam hai na mujhe shikva-e-bedād

sochte kyā ho jalāte raho zaḳhmoñ ke charāġh
dekhte kyā ho abhī sub.h ke āsār kahāñ

jaltā hai roz shaam ko ghāTī ke us taraf
din kā charāġh jhiil ke andar paḌā huā

itnī to us ne kī mirī dil-soziyoñ kī qadr
turbat pe ik charāġh sar-e-shām rakh diyā

ho charāg-e-ilm raushan Thiik se
log vāqif hoñ na.ī taknīk se

ka.ī charāġh muñDeroñ pe jal bujhe 'anvar'
use na aanā thā shāyad use na aanā thā

maiñ apnī zaat meñ tārīkiyāñ sameTe huuñ
tū ik charāġh jalā aur ab yahāñ se nikal