Tags-Chehra

ab ḳhvāb meñ ham us kī sūrat ko haiñ taraste
ai aarzū huā kyā baḳhtoñ kī yāvarī ko

tumheñ hai naam se kyā kaam misl-e-ā.īna
jo rū-ba-rū ho use sūrat-āshnā samjho

sūrat dikhā.e apnī dekheñ vo kis tarah se
āvāz bhī na ham ko jis ne kabhī sunā.ī

tum se to bas nibāh kī sūrat nikal paḌī
jis se hue the vaada o paimān tum nahīñ

kah nahīñ saktā kahāñ se aa.e ho, tum kaun ho
aisā lagtā hai ki ye sūrat hai pahchānī huī

'fānī' ummīd-e-marg ne bhī de diyā javāb
jiine kī hijr meñ koī sūrat nahīñ rahī

pathrā ga.ī thī aañkh magar band to na thī
ab ye bhī intizār kī sūrat nahīñ rahī

mar kar marīz-e-ġham kī vo hālat nahīñ rahī
yaanī vo iztirāb kī sūrat nahīñ rahī

ye aa.ine haiñ ki ham-chehra lashkaroñ kī safeñ
ye aks aks koī sūrat-e-adū kyā hai

jitne the rañg husn-e-bayāñ ke bigaḌ ga.e
lafzoñ ke baaġh shahar kī sūrat ujaḌ ga.e

har na.ī manzil kī jānib sūrat-e-abr-e-ravāñ
mere hāthoñ se nikal kar merā dil chalne ko hai

apnī sūrat-e-zard chhupātī phirtī huuñ
sab se apnā dard chhupātī phirtī huuñ

kyā tasavvur hai nihāyat mujhe hairat aa.ī
aa.ine meñ bhī nazar terī hī sūrat aa.ī

asar-e-ishq se huuñ sūrat-e-sham.a ḳhāmosh
ye muraqqa.a hai mirī hasrat-e-goyā.ī kā

mile haiñ log zamāne meñ be-usūl mujhe
kiyā hai sūrat-e-hālāt ne malūl mujhe

sūrat-e-lā meñ terī sūrat ko
ham ne dekhā to ham hī the maulā

kisī parinde kī vāpsī kā safar mirī ḳhaak meñ milegā
maiñ chup rahūñgā shajar kī sūrat shajar mirī ḳhaak meñ milegā

ik sadā kī sūrat ham is havā meñ zinda haiñ
ham jo raushnī hote ham pe bhī jhapaTtī raat

āshnā nā-āshnā se ho ga.e
apnī sūrat bhī na pahchānī ga.ī

kahāñ gardish falak kī chain detī hai sunā 'inshā'
ġhanīmat hai ki ham sūrat yahāñ do-chār baiThe haiñ