Tags-Chehra

sochte kuchh haiñ amal kuchh hai natīja kuchh hai
aisī sūrat meñ koī mas.ala hal kaise ho

sūrat-e-hāl badal jaatī hai ik lamhe meñ
aadmī apne irādoñ meñ aTal kaise ho

aap ke hote huur ko chāheñ
kyā vo sūrat janāb kī sī hai

kyuuñ na chūmeñ tumhārī sūrat ko
ye ḳhudā kī kitāb kī sī hai

kabhī maiñ Dhaltā huuñ kāġhaz pe naqsh kī sūrat
maiñ lafz ban ke kisī kī zabāñ meñ tairtā huuñ

sūrat-e-savāl huuñ maiñ pūchho na merā matlab
maiñ apne mudda.ā kī tasvīr hū-ba-hū huuñ

ḳhāna-e-dil sarā kī sūrat hai
koī is meñ makīñ huā hī nahīñ

jism kī sūrat rahe dil bhī masarrat meñ sharīk
rūh-e-āzādī bhī ho jaa.e haqīqat meñ sharīk

ret kī sūrat jaañ pyāsī thī aañkh hamārī nam na huī
terī dard-gusārī se bhī ruuh kī uljhan kam na huī

bhaTke hue ḳhayāl kī sūrat use mile
bhūlā huā umiid kā rastā samajh liyā

tishnagī aañkh kī kam ho koī sūrat nikle
pas-e-parda hī jhalak kaash dikhā dī jaa.e

gorī gorī hai un kī sūrat
us par gesū-e-siyāh kyā haiñ

terī sūrat dikhā.ī paḌtī hai
kyā ġhazal kyā ġhazāl meñ ai dost

māntā huuñ ghuT rahā hai dam tirā is habs meñ
gar yahī jiine kī sūrat hai to mar jā.egā kyā

rañgoñ se na rakhiye kisī sūrat kī tavaqqo
vo ḳhuun kā qatra hai jo shahkār banegā

sham.a jalvāte haiñ ġhairoñ se vo merī qabr par
ye na.ī sūrat nikālī hai jalāne ke liye

sūrat-e-lutf-o-karam ye ho to dil kyuuñ na jale
aag patthar ke bhī siine meñ nihāñ hai ki nahīñ

dasht-e-vahshat se nahīñ kam ye jahān-e-gul-o-bū
sūrat-e-reg-e-ravāñ umr-e-ravāñ hai ki nahīñ

us ne an-dekhā an-sunā kar ke be-ta.alluq kiyā hai to ab ham
us kī tasvīr se nikāleñge āñsuoñ ke hisāb kī sūrat

ye ravayya sahī nahīñ hotā yuuñ hameñ kashmakash meñ mat Daalo
yā hameñ sach kī tarah apnā lo yā bhulā bhī do ḳhvāb kī sūrat