Tags-Chehra

laġhzisheñ tanhā.iyoñ kī sab batā dī jā.eñgī
rañgateñ chehroñ kī is sūrat uḌā dī jā.eñgī

koī sūrat bhī nahīñ miltī kisī sūrat meñ
kūza-gar kaisā karishma tire is chaak meñ hai

dil ke ā.īne meñ ye tū hai ki maiñ
ek sūrat sī nazar aa.ī hai

dil ko ġham raas hai yuuñ gul ko sabā ho jaise
ab to ye dard kī sūrat hī davā ho jaise

tai kī hai ham ne sūrat-e-mahtāb rāh-e-shab
tūl-e-safar se paañv meñ chhāle hue nahīñ

ishq meñ tere guzartī nahīñ bin sar paTke
sūrat ik ye rahī hai umr basar karne kī

ab sūrat-e-hāl ban gayā huuñ
miltā huuñ nigāh-e-chārāgar meñ

mai-kada sāġhar surāhī aur sahbā aap haiñ
jo kisī sūrat na utre aisā nashsha aap haiñ

din kā chakkar raat ke phere paañv dabā kar raah kā chalnā
chor kī sūrat ḳhud ghabrā.eñ uf rī javānī haa.e zamāne

jise maiñ qatl kar ke ḳhush huā thā
har ā.īna vo sūrat ho ga.ī hai

ik sūrat utārnā ġhazal meñ
lafzoñ kā pasīnā chhūT jaanā

mirī sūrat jo dekhī ham-nashīñ se hañs ke farmāyā
yahī kohsār par ab mātam-e-farhād karte haiñ

sūrat ke tirī sāmne rah jaa.e hai kaise
har but kī nigah dīda-e-hairāñ se nikal kar

dukhātī hai dil phir mohabbat kisī kī
ki āñkhoñ meñ phirtī hai sūrat kisī kī

jise samajhte haiñ shā.irī ham safar musalsal hai ḳhushbuoñ kā
ġhazal kī shāḳhoñ pe ḳhūbsūrat jo shahr mahke to log samjhe

kam-sinī meñ na agar ġhair se jā kar milte
ham kabhī dekhte sūrat na shifā-ḳhāne kī

bāġh-e-ālam meñ hai be-rañg bayān-e-vā.iz
sūrat-e-barg-e-ḳhizānī hai zabān-e-vā.iz

hameñ ḳhushbū kī sūrat dasht-e-hastī se guzarnā thā
achānak yuuñ huā lekin ye qissa chhoḌ dete haiñ

har ek zaḳhm ko baḳhshī gulāb kī sūrat
badan kī sej pe kāñToñ ko ham ne phuul kiyā

mehrbāñ ho jaa.eñ to rañj-o-alam kī dhuup meñ
peḌ kī sūrat ghanerā sā.ebāñ hote haiñ log