Tags-Chehra

vo jo sūrat thī saath saath kabhī surḳh mahke gulāb kī sūrat
us kī yādeñ utartī rahtī haiñ zehn-o-dil pe azaab kī sūrat

apnī jhūTī anā kī bātoñ meñ aa ke us ko sulā to baiThe haiñ
ab haiñ sahrāoñ ke musāfir ham aur vo sūrat sarāb kī sūrat

maiñ ik kirdār kī sūrat ka.ī partoñ meñ jiitā huuñ
mirī be-chehragī kā ek chehra roz hotā hai

ham bhī tirī sūrat ke parastār haiñ lekin
kuchh aur bhī chehre hameñ marġhūb rahe haiñ

is but-kade meñ ma.anī kā kis se kareñ savāl
aadam nahīñ hai sūrat-e-ādam bahut hai yaañ

collage ke sab bachche chup haiñ kāġhaz kī ik naav liye
chāroñ taraf dariyā kī sūrat phailī huī bekārī hai

shāyad vo sañg-dil ho kabhī mā.il-e-karam
sūrat na de yaqīn kī is ehtimāl ko

pinhāñ hijāb-e-nāz meñ hai sūrat-e-jamāl
paidā harūf-e-shauq se mānā-e-ishq hai

koī to tark-e-marāsim pe vāsta rah jaa.e
vo ham-navā na rahe sūrat-āshnā rah jaa.e

har ik samt nāgin kī sūrat lapaktī huī tīrgī se hirāsāñ na ho
ajab kyā ki lau de uThe mere lams-e-farozāñ se terā sulagtā badan

bas ek ḳhvāb kī sūrat kahīñ hai ghar merā
makāñ ke hote hue lā-makāñ ke hote hue

dekh hī lete haiñ sab nāz-o-adā kī sūrat
aa.ina aap kā naqsh-e-kaf-e-pā hotā hai

nibhānā hai bahar-sūrat ye kārobār-e-duniyā
ki ishq-o-āshiqī kā silsila kaafī nahīñ hai

'daurāñ' sunā hai sūrat-e-gesū-e-ambarīñ
imsāl phir chaman meñ mahakne lagī hai shaam

kisī aahaT meñ aahaT ke sivā kuchh bhī nahīñ ab
kisī sūrat meñ sūrat ke sivā kyā rah gayā hai

zindagī ho mirī netāoñ kī sūrat yā-rab
ho faqat apnī ġharaz se hī mohabbat yā-rab

lab pe aatī hai duā ban ke ye chāhat merī
zindagī qaab ke chamchoñ kī ho sūrat merī

kyā tum bhī sāhil kī sūrat kaTte rahte ho
pal pal ġham kī lahreñ sahnā kaisā lagtā hai

batāo ai 'bahr' apnī jab kī kisī se tum ne bhī dil-lagī kī
ḳhush aa.ī sūrat kisī parī kī kisī pe tum ko bhī pyaar aayā