Tags-Dard

chalnā likhā hai apne muqaddar meñ umr bhar
manzil hamārī dard kī rāhoñ meñ gum huī

dil hijr ke dard se bojhal hai ab aan milo to behtar ho
is baat se ham ko kyā matlab ye kaise ho ye kyūñkar ho

hañste hañste hī sunegī vo mirī ġhazloñ ko
phir mire dard ko bhī miir kā dukh samjhegī

kyā kyā ne.amat baḳhshī hai us pyāre ne ye mat pūchho
dard diyā kuchh daaġh diye aur ashk diye pī jaane ko

maiñ uḌtī gard huuñ ahl-e-hunar ke teshe kī
aur ahl-e-dard kī bhī ḳhāk-e-pā meñ rahtā huuñ

tumhārī bazm se tanhā nahīñ uThā 'ḳhurshīd'
hujūm-e-dard kā ik qāfila rikāb meñ thā

vo bhī apne dard bhī apnā
āh-e-dil-e-nākām bhī apnī

vasl meñ ehtimāl-e-shādi-e-marg
chārāgar dard-e-be-davā hai ishq

udūl-e-hukmī-e-dard-e-jigar ki ab ai chashm
jo laakh baar vo uTh kar rulā.e hañs denā

dil kī zamīñ par bo.e the 'bāqar' biij jo dard judā.ī ke
chaliye ab vo fasl khaḌī hai vaqt aayā hai kaTā.ī kā

dard meñ mere sadā shāmil rahe
āñsuoñ kī ek Dhelī aur tum

sahrā sahrā ġham ke bagūle bastī bastī dard kī aag
jiine kā māhaul nahīñ hai lekin phir bhī jiite haiñ

jism ke bayābāñ meñ dard kī duā māñgeñ
phir kisī musāfir se raushnī zarā māñgeñ

dil ko ġham raas hai yuuñ gul ko sabā ho jaise
ab to ye dard kī sūrat hī davā ho jaise

maiñ musāfir din kī jaltī dhuup kā
raat merā dard pahchānegī kyā

nāvak-afgan batā to de āḳhir
dard meñ kyuuñ kamī nahīñ hotī

koī apnī hañsī ke parde meñ
dard dil kā chhupā rahā hogā

ajnabī shahr meñ chalo DhūñDeñ
koī to dard-āshnā hogā

dard kī sākit nadī phir se ravāñ hone ko hai
mauj-e-hairat kā tamāshā ab kahāñ hone ko hai

atā-e-dard kī tarsīl nā-mukammal hai
hamārī zaat kī tashkīl nā-mukammal hai