Tags-Dard

girānī-e-shab-e-hijrāñ do-chand kyā karte
ilāj-e-dard tire dardmand kyā karte

hujūm-e-dard meñ dil ne to sab kā saath diyā
milā na apne hī ashkoñ kā ham-navā mujh ko

itnā be-dard abhī dil to nahīñ hai merā
saath kyuuñ chhoḌ duuñ apnā maiñ zamāna ho jā.ūñ

kuchh aaise bhā ga.e hameñ duniyā ke dard-o-ġham
kū-e-butāñ meñ bhūlī huī yaad ham hue

haar bedard havāoñ se na maanī 'qaisar'
bādbāñ pheñk ke qadmoñ se bhañvar bāñdh liyā

mire āñsuoñ pe nazar na kar mirā shikva sun ke ḳhafā na ho
use zindagī kā bhī haq nahīñ jise dard-e-ishq milā na ho

tujhe kyā batā.ūñ maiñ be-ḳhabar ki hai dard-e-ishq meñ kyā asar
ye hai vo latīf sī kaifiyat jo zabāñ tak aa.e adā na ho

ye ināyateñ ye navāzisheñ mire dard-e-dil kī davā nahīñ
mujhe us nazar kī talāsh hai jo adā-shanās-e-vafā na ho

ġham-e-hayāt rahā hai hamārā gahvāra
ye ham se pūchh dil-e-dard āshnā kyā hai

dard meñ lazzat bahut ashkoñ meñ ra.anā.ī bahut
ai ġham-e-hastī hameñ duniyā pasand aa.ī bahut

gāloñ par ġhāze ke pīchhe dard ke sūkhe phuul
lachkīlī bāñhoñ kī shāḳhoñ par nafrat kī dhuul

jism kitnā bhī chāhe chhalnī ho
dard-e-dil se najāt hotī hai

dekhtā rahtā huuñ tujh ko us lamhe tak!
jab tak saarā dard se bhar nahīñ jaatā maiñ

ishq karnā use nibhā denā
dard varna behāl kartā hai

zaḳhm kahte haiñ dil kā gahna hai
dard dil kā libās hotā hai

āñkheñ pahchāntī haiñ āñkhoñ ko
dard chehra-shanās hotā hai

tire ḳhayāl kā sahrā ubuur karne meñ
hai naf.a dard kā lekin ḳhasāra ḳhvāb kā hai

dil ko nasīb soz-e-ġham-e-gulsitāñ kahāñ
hotā to aaj hotā ye dard-e-nihāñ kahāñ

dard ko zabt kī sarhad se guzar jaane do
ab sameTo na hameñ aur bikhar jaane do

dikhā duuñ chiir ke dil dard-e-dil kahūñ kab tak
zabāñ pe kyuuñ ye taqāzā-e-nāgavār rahe