Tags-Dard

kisī kā dard sunūñgā to TuuT jā.ūñgā
mire liye hai faqat merī dāstān bahut

'rūbī' chhupānā dard ko āsāñ na thā magar
ham aaḌ meñ hañsī kī chhupāte chale ga.e

mahsūs dil meñ dard sā hone lagā hai kyuuñ
kyā pyaar kī nazar meñ bhī shāmil fareb hai

kahāñ jaa.eñ chhoḌ ke ham use koī aur us ke sivā bhī hai
vahī dard-e-dil bhī hai dosto vahī dard-e-dil kī davā bhī hai

rahegī mohabbat javāñ mere dil meñ
tirā dard jab tak satātā rahegā

ab is kā chāra hī kyā ki apnī talab hī lā-intihā thī varna
vo aañkh jab bhī uThī hai dāmān-e-dard phūloñ se bhar ga.ī hai

zabt kī qaid-e-saḳht ne ham ko rihā nahīñ kiyā
dard pe dard uThā magar shor bapā nahīñ kiyā

dil kā har dard kho gayā jaise
maiñ to patthar kā ho gayā jaise

mai ho abr o havā nahīñ to na ho
dard ho gar davā nahīñ to na ho

dard kī kitāboñ meñ haath kī lakīroñ meñ
ham ne pā ke dekhā hai ġham kahāñ nahīñ milte

vaqt hī dard ke kāñToñ pe sulā.e dil ko
vaqt hī dard kā ehsās miTā detā hai

zahar detā hai koī koī davā detā hai
jo bhī miltā hai mirā dard baḌhā detā hai

dard vo dil meñ vo siine par hai daaġh
jis kā marham jis kā darmāñ aur hai

aap marham hī lagāte rah ga.e
kyā kaheñ ye dard saarā aur hai

ye dard kā hai musalsal jo silsila kyuuñ hai
Thahar Thahar ke koī dil meñ jhāñktā kyuuñ hai

aaj is dard kī barsāt ke din
bel se ek mahak uTThī hai tūfāñ kī tarah

ranj-o-ġham se milāyā thā tū ne mujhe
tū batā dard meñ kyoñ kamī chhoḌ dī

koī hañs hañs ke sune aur maiñ ro ro ke kahūñ
lutf donoñ ko mile dard ke afsāne se

maiñ ro ro ke kahne lagā dard-e-dil
vo muñh pher kar muskurāne lagā

be-ḳhvāb rāstoñ meñ ye ta.abīr-e-dard-e-dil
mil to ga.ī hai mujh ko magar der se milī