Tags-Dard

aise aise dard mile haiñ na.e dayāroñ meñ ham ko
bichhḌe hue kuchh log purāne yārāne yaad aate haiñ

zañg-ālūd paḌe the tirī ġhaflat ke sabab
ham vahī dard ke hathiyār uThā laa.e haiñ

pachhāḌeñ khā rahā huuñ loTtā huuñ dard-e-furqat se
ajal ke paañv TūTeñ kyuuñ nahīñ is vaqt aatī hai

rañj hai dard hai udāsī hai
zindagī har tarah mukammal hai

kabhī dast-e-zulf se the baham kabhī ruḳh ke lete the bose ham
shab-o-roz ab to hai dard-o-ġham kabhī vuuñ bhī lail-o-nahār thā

raat jaltī hai sulagte hue sahrā kī tarah
dard agar ho to kisī aañkh se dariyā nikle

ye nayā phuul hai aur ye ḳhushbū na.ī
ye na.ī shaam hai aur nayā dard hai

pyaar se ishq tak jā-ba-jā raushnī
pyaar se ishq tak jā-ba-jā dard hai

chhoḌ 'shāhīñ' vafā kā tū ab tazkira
bevafā hai ḳhushī bā-vafā dard hai

maiñ ne pūchhā vafā kā sila jo kabhī
us ne hañs kar ye mujh se kahā dard hai

ek pal meñ kahāñ kho ga.ī hai ḳhushī
ab to ulfat kī bas ik sazā dard hai

ibtidā dard hai intihā dard hai
ishq kā dard to lā-davā dard hai

maiñ to Darne lagī us kī ta.abīr se
pyaar āñkhoñ meñ jab se banā dard hai

zaḳhm kaisā hai bhartā nahīñ hai kabhī
dard hotā nahīñ hai ye kyā dard hai

mahram-e-dard-o-masarrat rāz-dār-e-sub.h-o-shām
mahfil-e-fitrat kī ḳhamoshī hai tujh se ham-kalām

dard-e-hijrat ke satā.e hue logoñ ko kahīñ
sāya-e-dar bhī nazar aa.e to ghar lagtā hai

kuchh dard kī shiddat hai kuchh pās-e-mohabbat hai
ham aah to karte haiñ fariyād nahīñ karte

andar andar dard kī lahreñ uupar se
har dam hañsne aur hañsāne vaalā maiñ

is shaḳhs ko dukh-dard satātā bhī nahīñ hai
jis dil meñ rahā kartā hai īmān-e-mohabbat