Tags-Dard

ham bhī achchhe haiñ dard bhī kam hai
dil se uTThā magar dhuāñ sā kyā

dil se kāñTā nikālne ke ba.ad
dard apnī kamī se duur huā

ye kaisī yaas hai rone kī bhī aur muskurāne kī
ye kaisā dard hai ki jhunjhunāhaT hotī jaatī hai

maanā ki mohabbat ke haiñ dushvār taqāze
be-yār ke jiinā bhī to ik dard-sarī hai

ik aziyyat hai to lazzat bhī tire dard meñ hai
be-sukūnī meñ bhī ārām bahut aatā hai

us nāfa-e-nigāh se pāgal hue to kyā
zanjīr hai ye dard kā āzād ishq meñ

hairāniyoñ ke zaḳhm kā marham kahāñ 'nadīm'
dil sehr-e-dard se huā bedār ishq meñ

kiyā hai dard-e-dil-e-zār ne use aajiz
laboñ pe jān-e-hazīñ aa.ī hai fuġhāñ ke liye

rūnumā ho chaman-e-dahr meñ ai abr-e-nashāt
dard kī dhuup meñ sañvlā.ī haiñ komal rūheñ

dard ke sahāre kab talak chaleñge
saañs ruk rahī hai fāsla baḌā hai

mujhe sun tarāna-e-dard meñ mujhe dekh chehra-e-zard meñ
mujhe DhūñD ġham kī panāh meñ ki vo merā shāmil-e-hāl hai

jī dard se hai niDhāl apnā
kis kis ko sunā.eñ haal apnā

ḳhudā kī den nahīñ zarf-e-ḳhalq par mauqūf
ye dil bhī kyā hai jise dard kā ḳhazāna milā

tamannā dard-e-dil kī ho to kar ḳhidmat faqīroñ kī
nahīñ miltā ye gauhar bādshāhoñ ke ḳhazīnoñ meñ

kahāniyoñ kī guzargāh par bhī niiñd nahīñ
ye raat kaisī hai ye dard jāgtā kyuuñ hai

hijrāñ kī shab jo dard ke maare udaas haiñ
un kī nazar meñ chāñd sitāre udaas haiñ

be-dard hai insāñ to haiñ sab is ke hunar aib
hai dil meñ agar dard to har aib hunar hai

yaad tirī thī ki mire dil meñ gaḌī thī
dard mirā thā kisī shumār meñ na thā

dard-e-jigar kam thā ki nahīñ thā ye to batā dam thā ki nahīñ thā
kah to marīz meñ kuchh bhī dekhā nabz jo tū ne masīhā dekhī

dard kī aañkh se tere ġham kā lahū
ban ke sailāb bahne lagā chār-sū