Tags-Dard

kaise rafū hoñ chāk-e-garebāñ maiñ bhī sochūñ tū bhī soch
apne apne dard kā darmāñ maiñ bhī sochūñ tū bhī soch

ġhurfa-e-dard kis ne khol diyā
tū to ab mere ās-pās nahīñ

merī betābī kī mushkil aap āsāñ ho ga.ī
baḌh gayā dard-e-dil-e-betāb to kam ho gayā

dard kyā kyā na mile shauq-e-talab se apne
zaḳhm kyā kyā na diye zauq-e-hayā ne tere

har moḌ pe safar thā ajab bolne na paa.e
manzil milī jo dard kī lab bolne na paa.e

mujh kuuñ har aan tire dard siiñ bahbūdī hai
ishq-bāzī meñ ruḳh-e-zard zar-e-sūdī hai

bahar-e-darmāñ un ko jab aanā paḌā
dard-e-dil ko aur baḌh jaanā paḌā

shab ke sannāTe meñ ye kis kā lahū gaatā hai
sarhad-e-dard se ye kis kī sadā aatī hai

donoñ haiñ un ke hijr kā hāsil liye hue
dil ko hai dard dard ko hai dil liye hue

ishrat-e-duniyā hai ik ḳhvāb-e-bahār
kāba-e-dil dard se ābād kar

dil ko taskīn kī zarūrat hai
dard ko gungunā ke dekhte haiñ

phir nayā dard chāhtā hai ye dil
us kī bātoñ meñ aa ke dekhte haiñ

ye taġhayyur rū-numā ho jā.egā sochā na thā
us kā dil dard-āshnā ho jā.egā sochā na thā

tumhārī yaad meñ duniyā ko huuñ bhulā.e hue
tumhāre dard ko siine se huuñ lagā.e hue

jale to saath jaleñgī ye jhāḌiyāñ 'iz.hār'
kisī ke shahr meñ to dard yuuñ na baTtā thā

dard kī dhuup meñ sahrā kī tarah saath rahe
shaam aa.ī to lipaT kar hameñ dīvār kiyā

dard jab shā.erī meñ Dhalte haiñ
dil meñ har-sū charāġh julte haiñ

nigāh-e-nāz-e-ibārat hai zindagī jis se
sharīk-e-dard to kyā dard-āshnā bhī nahīñ

dard-e-dil kahte hue bazm meñ aatā hai hijāb
taḳhliya ho to kuchh ahvāl sunā.eñ tujh ko

baiThe shīsh-mahloñ meñ tum samajh na pāoge
ḳhaar kaise paañv meñ dard ban ke chubhtā hai