Tags-Dard

milā ek guuna sukūñ hameñ jo tumhāre hijr meñ ro liye
zarā bār-e-qalb subuk huā ka.ī daaġh dard ke dho liye

ta.amīr mudda.ā talab-e-zauq ho ga.ī
buniyād-e-dard hogī to dīvār uThā.eñge

harf-āshnā na hogī koī mauj-e-dard-e-dil
siine pe rakh ke haath magar baiTh jā.eñge

likkheñge qahqahoñ se bas ik dāstān-e-dil
us par hadīs-e-dard kā unvāñ jamā.eñge

zindagī dard kī tasvīr na banñe paa.e
bolte rahiye zarā hañste hañsāte rahiye

charāġh-e-dard tāq-e-jāñ pe rakh kar
havāoñ ko machalte dekhnā hai

qaum ke dard se huuñ soz-e-vafā kī tasvīr
merī rag rag se hai paidā tap-e-ġham kī tāsīr

dard hai dil ke liye aur dil insāñ ke liye
tāzgī barg-o-samar kī chamanistāñ ke liye

bahut dil ko dukhātā hai kabhī jab dard-e-mahjūrī
tirī yādoñ kī jānib muskurā kar dekh letā huuñ

tū ḳhud hī apnī tarz-e-sitam par nigāh rakh
maiñ kyā kahūñ ye dard-e-jigar mujh se chhīn le

ik duniyā ko taḌpātī haiñ jaanā na adā.eñ bhārat kī
par dil par choT lagātī haiñ pur-dard sadā.eñ bhārat kī

idhar taqāze haiñ maslahat ke udhar taqāzā-e-dard-e-dil hai
zabāñ sambhāleñ ki dil sambhāleñ asiir zikr-e-vatan se pahle

ahl-e-zabāñ to haiñ bahut koī nahīñ hai ahl-e-dil
kaun tirī tarah 'hafīz' dard ke giit gā sake

samajh na paayā koī dard bikhre lamhoñ kā
ye shaam phir se huī ashk-bār chāroñ taraf

dard-e-firāq kī sahar-e-avvalīñ 'hafīz'
uThte hī jānib-e-dar-o-dīvār dekhnā

ye maiñ kahūñgā falak pe jā kar zamīñ se aayā huuñ tañg aa kar
jo ai masīhā tū hai masīhā to kuchh mire dard kī davā kar

vo shoḳh be-e'tibār kāfir rahā na tanhā gayā na tanhā
jo dard uTThā uThā uThā kar to dil ko baiThā biThā biThā kar

zabt kā dil meñ kar ke ahd un se baḌhāyā mel-jol
dard se pahle dard kī ham ne davā ḳharīd lī

dard hī dard jis ke sheroñ meñ
aur hai kaun sirf 'hairat' hai

zindagī ko sambhāl kar rakhnā
ek be-dard kī amānat hai