Tags-Dard

mere dard meñ ye ḳhalish kahāñ mere soz meñ ye tapish kahāñ
kisī aur hī kī pukār hai mirī zindagī kī sadā nahīñ

diloñ meñ dard kī daulat bachā bachā ke rakho
ye vo matā.a hai jo umr bhar zarūrī hai

koī is dard ke rishte ko nibhā.e kyuuñ kar
chārasāzī jo kare vo koī ġham-ḳhvār bhī ho

dard dil se kabhī judā na huā
koī hamdard aap sā na huā

tum ne bhī sun rakkhā hogā ham bhī sunte aa.e haiñ
jis ke dil meñ dard na ho vo patthar hai insān nahīñ

vo hotā to phir bhī shāyad dard pe kuchh qaabū rahtā
tanhā.ī se tanhā laḌnā kuchh aisā āsān nahīñ

dard kaḌā ho to bhī aksar patthar ban jaate haiñ log
marne kī ummīd nahīñ hai jiine kā sāmān nahīñ

zindagī dard bhī davā bhī thī
ham-safar bhī gurez-pā bhī thī

dard mahjūrī kā ā.īna hai apne rū-ba-rū
jab nazar aayā na to apnā tamāshā kar liyā

uTThe haiñ ab nigāh se parde fareb ke
juz dard-o-ġham ḳhushī kā jahāñ meñ nishāñ kahāñ

hazār dard-e-farā.ez haiñ aur dil-e-tanhā
mire ḳhulūs ko sharmindagī sī rahtī hai

mauja-e-dard se jismoñ meñ ravānī de jā
ḳhushk dariyāoñ nadī nāloñ ko paanī de jā

maiñ shajar huuñ mausam-e-dard kā yahī rut hai mere liye sadā
kabhī shāḳh shāḳh harī milī kabhī barg barg judā milā

ai ham-nafaso dard kī ye raat kaḌī hai
sar thāme hue dil meñ kahīñ aas khaḌī hai

ḳhat meñ likhvā kar unheñ bhejā to matlā dard kā
dard-e-dil apnā jatānā koī ham se siikh jaa.e

kitne jauhar kar diye paidā ma.āl-e-ishq ne
dil meñ kaisā soz kaisī dard-mandī ho ga.ī

vo aa.e haiñ zarā un se ham apnā haal kah lete
hamāre dard-e-dil meñ kuchh kamī hotī to achchhā thā

tum mere saath bhī judā bhī ho
tum mirā dard bhī davā bhī ho

ḳhud ko bachā.ūñ jism sambhālūñ ki ruuh ko
bikhrā huā hai dard yahāñ se vahāñ talak

ye dard to ārām-e-do-ālam se sivā hai
ai dost tire dard ko kam hone na deñge