Tags-Dard

niyāz-e-mohabbat se ye be-niyāzī ḳhulūs-e-mohabbat se itnā taġhāful
mirā dard tum ne mirā haal tum ne na jaanā na samjhā na pūchhā na dekhā

bahut sair kī bāġh-e-jannat kī ham ne magar kuchh mazā zindagī kā na dekhā
kisī dil meñ dard-e-mohabbat na paayā kisī dil meñ dāġh-e-tamannā na dekhā

ik dard mohabbat hai mirī har rag-o-pai meñ
har saañs hai ab merā ik āvāz-e-mohabbat

maiñ ne jo kahā dard baḌhāyā nahīñ jaatā
kahne lage nādān jatāyā nahīñ jaatā

dard kī saarī taheñ aur saare guzre hādse
sab dhuāñ ho jā.eñge ik vāqi.a rah jā.egā

mauja-e-dard banā degā unheñ misl-e-sabā
vo jo phirte haiñ yahāñ sūrat-e-sarsar saare

terī marzī jo dekh paa.ī hai
ḳhalish-e-dard kī ban aa.ī hai

kaun dil hai jo dardmand nahīñ
kyā tire dard kī ḳhudā.ī hai

dard thamtā hī nahīñ siine meñ ārām ke ba.ad
ham to jalte haiñ charāġhoñ kī tarah shaam ke ba.ad

chīḳh uThtī haiñ ghar kī dīvāreñ
dard kab be-zabān hotā hai

mujh se zabt-e-dard-e-ulfat kī shikāyat hai fuzūl
ai dil-e-nādāñ tujhe ehsās-e-ḳhud-dārī nahīñ

shab-e-furqat meñ yār-e-jānī kī
dard-e-pahlū ne mehrbānī kī

insāñ kahūñ unheñ ki farishtoñ kā naam duuñ
jo log dard-mañd haiñ be-ghar ke shahr meñ

kisī ke dard ko tum jānte bhalā kyūñkar
ḳhud apne dard se jab tum ko āgahī na huī

ḳhabar nahīñ ki tirī yaad kyā tirā ġham kyā
magar vo dard jo hotā hai saañs lene meñ

raas aane lagī duniyā to kahā dil ne ki jā
ab tujhe dard kī daulat nahīñ milne vaalī

sadiyoñ kā dard vaqt kī āvāz ban gayā
phir se bapā vo ma.arka-e-karbalā huā

aur to paas mire hijr meñ kyā rakkhā hai
ik tire dard ko pahlū meñ chhupā rakkhā hai

dūdmān-e-dard kī shādī haiñ ham
ḳhāndān-e-ġham kī ābādī haiñ ham

is ik savāl ke kitne azaab jhel chukā
kuchh aur dard banū aur imtihāñ dekho