Tags-Dard

phir dil meñ dard silsila-e-jumbā hai kyā karūñ
phir ashk garm-e-dāvat-e-mizhgāñ hai kyā karūñ

dard baḌh kar davā na ho jaa.e
zindagī be-mazā na ho jaa.e

ye havas hai ki dard-e-jigar meñ marūñ jo masīh bhī aa.e to dam na bharūñ
kabhī tere sivā na ilaaj karūñ mujhe tere hī dast-e-shifā kī qasam

vo ruḳh-e-husn-e-samā.at hai kisī aur taraf
ham abas dard ko āvāz meñ rakkhe hue haiñ

mahak uTThā yakāyak regzār-e-dard-e-tanhā.ī
kise ai yād-e-jānāñ tū yahāñ tak DhūñDne aa.ī

ishq se tabī.at ne ziist kā mazā paayā
dard kī davā paa.ī dard-e-be-davā paayā

aap bhī kaise shahar meñ aa kar shā.ir kahlā.e haiñ 'alīm'
dard jahāñ kamyāb bahut hai naġhmoñ kī arzānī hai

ye ġhazleñ ġhaib se nāzil nahīñ ashkoñ kā hāsil haiñ
mirā ye dard hī sab se baḌā ilhām hai saaqī

tasavvur zulf kā gar chhoḌ duuñ mizhgāñ kā khaTkā hai
jo sar ke dard se fursat milī dard-e-jigar hogā

dil kī māyūs tamannāoñ ko mar jaane do
dard ko āḳhirī manzil se guzar jaane do

bhar rahā huuñ kis sharāb-e-dard se jām-e-ġhazal
ruuh meñ kuchle hue jazbāt kī ik nahr hai

zindagī kī yahī qīmat hai ki arzāñ ho jaao
naġhma-e-dard liye mauja-e-ḳhushbū kī tarah

lahū meñ āj-kal hiddat bahut mushkil se aatī hai
kisī ke dard kī chāhat bahut mushkil se aatī hai

vo mire ġham kā mudāvā nahīñ hone detā
zarra-e-dard ko sahrā nahīñ hone detā

tā-kujā zabt-e-mohabbat tā-kujā dard-e-firāq
rahm kar mujh par ki terā raaz kahlātā huuñ maiñ

baat 'jāmī'-sāhib kī talḳh bhī hai shīrīñ bhī
dard halkā halkā sā tarz-e-guftugū meñ hai

phuul jab koī bikhartā hai to hañs dete haiñ
dard jab had se guzartā hai to hañs dete haiñ

tamāsha dekhne vaale tamāsha ban ke rah jaa.eñ
ba-qadr-e-dard tum se dil ko taḌpāyā nahīñ jaatā

haal pūchhā hai mirā poñchhe haiñ aañsū mere
shukriya tum ne mire dard meñ shirkat kī hai