Tags-Dard

ye shiddat dard kī us ke na hone se na hotī
yaqīnan aur kuchh us ke sivā gum ho gayā hai

kar rahā huuñ duā ki dard baḌhe
fikr kartā huuñ roz marham kī

dekhte rahte ho sab kuchh bolte kuchh bhī nahīñ
kis qadar bedard ho dard-āshnā hote hue

kuchh to dard diye haiñ mujh ko duniyā vāloñ ne
lekin kuchh aise ġham haiñ jo mere zaatī haiñ

har guzarte hue lamhe meñ Tapaktā huā meñ
dard huuñ, vaqt ke a.asāb meñ aayā huā huuñ

dard ke taar milne to de hoñT hilne to de
saarī bāteñ kareñge raqam sabr kar sabr kar

din meñ sarmāya-kārī jo kī dard kī
ham ḳhasāre chukāte rahe rāt-bhar

terī yādoñ ke lamhe bhī bedard the
tujh ko mujh se churāte rahe rāt-bhar

jise ziist se koī pyaar thā use zahr se sarokār thā
vahī ḳhāk-o-ḳhūñ meñ paḌā milā jise dard-e-dil ne mazā diyā

ik KHvaab machaltaa hai jo ban ban ke lahuu tuu
ik dard jo bharne nahii.n detaa hame.n dam ham

ham ahl-e-dard jahāñ bhī haiñ silsila sab kā
tumhāre shahr ke āshuftagāñ se miltā hai

tez havā ke zālim jhoñke lamha lamha saath rahe
lamha lamha ik muddat tak dard jo uTThā bhuul ga.e

ābanā.e-dard ke donoñ taraf hai dasht-e-ḳhauf
ab to chāra jaan dene ke sivā kuchh bhī nahīñ

jald tum uTTho dauḌ ke aao ham ko thāmo ham ko sambhālo
girte haiñ misl-e-ashk zamīñ par uThte haiñ shakl-e-dard-e-jigar ham

dard-e-furqat kī qasam shām-e-musībat kī qasam
lagī 'tanvīr' palak se na palak to dekho

rāt-bhar koī na so.e to sune shor-e-fuġhāñ
chāñd ko dard sunātā hai samundar apnā

dard pe kaisā sharar ban ke uThā pahlū meñ
ham to yuuñ ḳhush the ki dil kar liyā patthar apnā

ye qismat daaġh jis meñ dard jis meñ
vo dil ho luuT dast-e-nāznīñ par

lab pe jabran hañsī bhī laate haiñ
dard meñ kuchh kamī nahīñ hotī

maañg kar ham laa.e the allāh se ik dard-e-ishq
vo bhī ab taqdīr ne auroñ kā hissa kar diyā