Tags-Dard

tum mirā dard kyā samajh paate
tum ne to sher tak nahīñ samjhā

haath se nāptā huuñ dard kī gahrā.ī ko
ye nayā khel milā hai mirī tanhā.ī ko

lutf-e-kalām kyā jo na ho dil meñ dard-e-ishq
bismil nahīñ hai tū to taḌapnā bhī chhoḌ de

kyā sunātī hai ye sāzoñ kī sadā-e-dil-soz
kuchh hamīñ dard-nasīboñ kā bayāñ ho jaise

dil meñ hazār dard hoñ aañsū chhupā ke rakh
koī to kārobār ho bin ishtihār ke

kyā jaane ab bhī dard ko kyuuñ hai mirī talāsh
TukḌe bhī ab kahāñ bache is ke shikār ke

ab dard bhī ik had se guzarne nahīñ paatā
ab hijr meñ vo pahlī sī vahshat nahīñ hotī

na dil rahe na mohabbat rahe na dard rahe
chalo akele meñ mil kar ye faisla kar leñ

dard ko is se koī farq nahīñ paḌtā
ham be-kār hurūf ulaTte rahte haiñ

dard ke ruḳh darvāze rakheñ chāñd ke ruḳh khiḌkī
kaash kirā.e vo chunvā.ī ham majbūroñ se

ye shīshe kī āñkheñ ye patthar ke chehre
mirā dard kis se guzārish karegā

bahut se dard to ham baañT bhī nahīñ sakte
bahut se bojh akele uThāne paḌte haiñ

daaġh dhul ga.e ab to dard meñ kamī sī hai
zindagī na jaane kyuuñ phir bhī ajnabī sī hai

dard uThne se dil ke sharāre kahāñ bujh sake haiñ kabhī
laakh raushan nigāhoñ meñ ḳhuuñ lā bharo aas martī nahīñ

har ek shaḳhs milā dāstān-e-dard liye
ham apne zaḳhm-e-nihāñ be-libās kyā karte

rahtā hai haDDiyoñ se mirī jo humā lagā
kuchh dard-e-āshiqī kā use bhī maza lagā

kisī ke jaur-e-musalsal kā faiz hai 'aḳhgar'
vagarna dard hamāre suḳhan meñ kitnā thā

atā ho to atā ho dard aisā
ho lazzat jis meñ soz-e-dā.imī kī

beTe tū jāntā nahīñ hai maañ kī ahmiyat
maañ kī tarah tū dard sahe to pata chale

shaam chhat par utar ga.ī hogī
dard siine meñ bhar ga.ī hogī