Tags-Dard

dard biktā nahīñ bāzār-e-jahāñ meñ varna
jaan tak bech ke letā maiñ tire dil ke liye

jo jaañ se hai aziiz use tū judā bhī rakh
ḳhushiyoñ ke muñh meñ dard bharā zā.iqa bhī rakh

yuuñ bhī na ho ki jo bhī uThe tujh meñ jhāñk le
ḳhud meñ na yuuñ simaT koī dard-āshnā bhī rakh

pahlū meñ mere dil ko na ai dard kar talāsh
muddat huī ġharīb vatan se nikal gayā

nashāt-e-ārzū ḳhvāb-e-tamannā dard-e-mahrūmī
mohabbat ne uThā.e sab hijāb āhista āhista

vo bajā.e aah 'fārūq' abhī vaah kar rahe haiñ
abhī dard se hai ḳhālī ye navā-e-āshiqāna

havā meñ nauhe ghule durd mish.aloñ meñ rahā
bahut ajiib sā dukh thā ki bastiyoñ meñ rahā

tujh ko dil-dard kā nahīñ ehsās
so mirī pinḌliyoñ ko daab nahīñ

āThoñ pahr lahū meñ nahāyā kare koī
yuuñ bhī na apne dard ko dariyā kare koī

har qāfila-e-dard-rasīda kī hai manzil
kyā jāniye ārām hai kyā mulk-e-adam meñ

vaqār-e-ishq par us daur se bhī harf aatā hai
'azīz-vārsī' vo dard jo paiham nahīñ hotā

phir āshnā-e-lazzat-e-dard-e-jigar haiñ ham
phir mahram-e-kashākash-e-har-ḳhair-o-shar haiñ ham

maiñ āshna-e-dard-o-ġham-e-dil huuñ chāra-gar
jis se ifāqa ho mujhe aisī davā na de

maiñ aap apnā dard jagātā huuñ raat bhar
kuchh tum pe inhisār nahīñ kar rahā huuñ maiñ

kabhī ishq sāz-e-hayāt thā kabhī soz-e-dil ne jalā diyā
kabhī vasl meñ bhī kasak rahī kabhī dard-o-ġham ne bhī mazā diyā

haa.e koī davā karo haa.e koī duā karo
haa.e jigar meñ dard hai haa.e jigar ko kyā karūñ

pa.e tāzīm-e-dard uThtā hai ai nāvak-fagan dil meñ
qadam-ranja jo tere nāvak-e-bedād karte haiñ

jo rañg uḌā vo rañg āḳhir laayā
dard-o-ġham o soz-o-sāz kyā kyā paayā

bhaTak rahā thā añdhere meñ dard kā dariyā
vo ek raat kā jugnū thā raah jaisā thā

ġham kī apnī hī shakleñ haiñ
dard kā apnā hī chehra hai