Tags-Dard

na the āshiq kisī be-dād par ham jab talak 'tābāñ'
hamāre dil ke ta.iiñ kuchh dard-o-ġham tab tak na thā hargiz

tabīboñ se ilāj-e-ishq hotā hai nipaT mushkil
hamāre dard kī un se nahīñ hone kī davā hargiz

dil jis kā dard-e-ishq kā hāmil nahīñ rahā
vo shaḳhs tere pyaar ke qābil nahīñ rahā

jab aap muskurā.e ġham-e-dil kī baat par
dil dard ko chhupāne ke qābil nahīñ rahā

diloñ kā dard kisī taur kam nahīñ hogā
agar tasavvur-e-sūd-o-ziyāñ nahīñ badlā

kuchh aur chīzeñ haiñ duniyā ko jo badaltī haiñ
ki apne dard ko apne liye ibārat kar

ufuq nahīñ to kisī chāñd kā tasavvur kyā
sitāre Duub ga.e dard ke zavāl ke saath

ab us maqām pe manzil hai dard-e-paiham kī
ki har taḌap meñ milī lazzat-e-qarār mujhe

ye un kī yaad ye tūfān-e-rañg-o-bū tauba
milī to dard meñ Duubī huī bahār mujhe

ye dard ki hai terī mohabbat kī amānat
mar jā.eñge is dard kā darmāñ na kareñge

ek zarā sā dard milā aur kāġhaz kaale kar Daale
ek zarā se hijr pe ik hañgāma machā ke rakhtā huuñ

soz-e-dil dard-e-jigar ḳhūn-e-tamannā ashk-e-ġham
ek laġhzish kitne afsānoñ kā unvāñ ho ga.ī

dil na sambhlā thā agar dekh ke jalva us kā
tū ne ai dard-e-jigar uTh ke sambhālā hotā

raat aisī ki kabhī jis kā saverā na huā
dard aisā ki koī jis kā masīhā na huā

tujhe jyuuñ ġhuncha gar hai dard kī bū
lahū kā ghūñT pī dil-tañg ho jā

dard kā rasta hai yā hai sā.at-e-roz-e-hisāb
saikaḌoñ logoñ ko rokā ek bhī Thahrā nahīñ

ai 'urūj' ye duniyā qadr-e-dard kyā jaane
kyuuñ zamāna-sāzoñ ko hāl-e-dil sunātā hai

bayān kī ehtiyāj hai kab rahā hai sirf ek harf-e-matlab
'habīb' kā dard-e-dil sunā sab ab is kā chāra na kījiyegā

dard-e-dil meñ yuuñ bhī jab hotī nahīñ koī kamī
kyā zarūrī hai izāfa husn ke andāz meñ

kyā pūchhte ho dard ko 'hātim' ke dostāñ
jo kuchh ki huuñ so huuñ ġharaz āfat-rasīda huuñ