Tags-Dard

haañ nahīñ shart-e-muravvat hasrat-e-tāsīr-e-dard
rahm aa hī jā.egā un se taqāzā kyā kareñ

baiTh kar maiñ likh gayā huuñ dard-e-dil kā mājrā
ḳhuun kī ik buuñd kāġhaz ko rañgīlā kar ga.ī

kuchh to us ke apne dil kā dard bhī shāmil hī thā
kuchh nashe kī lahr bhī us ko surīlā kar ga.ī

kisī ke sāmne phailā.īñ kis liye dāman
tumhāre dard kī daulat jo paas rakhte haiñ

ye maqām-e-ishq hai kaun sā ye haiñ kaisī sabr kī manzileñ
na taḌap hai dil meñ na dard hai na sukūn hai na qarār hai

saare chaman ko dasht meñ tabdīl kar ga.e
be-dard the jo ain javānī meñ mar ga.e

hazār dard hai aur jān-e-nā-tavāñ merī
ilaaj hai na gale kā javāz kyā kiije

hamāre paas hai hikmat na raaz kyā kiije
sivā.e dard-e-dil-e-jāñ-gudāz kyā kiije

usī kī sharh hai ye uThte dard kā aalam
jo dāstāñ thī nihāñ tere aañkh uThāne meñ

is qadar Duubā huā dil dard kī lazzat meñ hai
terā āshiq anjuman hī kyuuñ na ho ḳhalvat meñ hai

kaun zamāne-bhar kī Thokareñ khā kar ḳhush hai
dard kisī ko pyārā kaise ho saktā hai

mushfiq ne ye bāteñ sun ke kahā bāteñ na huiiñ ash.ār hue
ye dard baTāne vaale bhī kis shaan ke ḳhush-guftār hue

maiñ ek dard sahī phir bhī miT nahīñ saktā
sabab ye hai ki dil-e-chāra-gar meñ rahtā huuñ

dard-o-ġham sahne kī aadat is qadar puḳhta huī
hārnā āḳhir hamārā mashġhala bantā gayā

jaan jaa.e ki rahe aap ke aate aate
aur se aur hai ab dard-e-jigar kī sūrat

hamāre dard kī daarū agar kuchh hai to daarū hai
ye sab kuchh sun ke saaqī baat pī jaane se kyā hāsil

ḳhūgar-e-dard haiñ sab kuchh vo sahā karte haiñ
dushmanoñ se nahīñ matlab ki vo kyā karte haiñ

hijr to hijr thā ab dekhiye kyā bītegī
us kī qurbat meñ ka.ī dard na.e aur bhī haiñ

sunī jo merī kahānī to ro paḌe sab log
sabhoñ ke dard meñ ik rishta-e-nihāñ niklā

ye nahīñ ki dard-e-dil dard-e-jigar kā ḳhauf thā
us ke jaane se hameñ kuchh aur bhī nuqsān the