Tags-Dard

bardāsht dard-e-ishq kī dushvār ho ga.ī
ab zindagī bhī jaan kā āzār ho ga.ī

surūr-e-justajū maġhrib kī matvālī havāoñ kā
sabhī paayā magar darmān-e-dard bebasī mushkil

itnā pur-josh mere dard kā dhārā to na thā
kyā pas-e-parda kahīñ qurb tumhārā to na thā

kahāñ tum dard-e-dil le kar chale 'najm'
mizāj-e-dard-e-dil pūchhā na jaa.e

tire josh-e-karam se Dar rahā huuñ
dil-e-dard-āshnā itrā na jaa.e

Tahniyāñ kaT kaT ke ug aatī haiñ phir se dard kī
ik sanobar karb kā ban kar harā rahtā huuñ maiñ

mujhe mere haal pe chhoḌ do mire dosto ye karam karo
mirī umr-e-rafta ko do sadā mujhe dard de ke kidhar ga.ī

'āftāb' aaj mohabbat ne asar dikhlāyā
un ke siine meñ bhī ab dard uThā mere ba.ad

dard ke chāñd kī tasvīr ġhazal meñ aa.e
sher likkhūñ to ye tāsīr ġhazal meñ aa.e

hairat se us ko dekhte haiñ misl-e-ā.ina
ifshā-e-dard-e-dil se khaḌā be-javāb huuñ

do ghaḌī dard ne āñkhoñ meñ bhī rahne na diyā
ham to samjhe the baneñge ye sahāre aañsū

vo musāfir pā-ba-jaulāñ jaane kyuuñ lab-doz the
ek jaisā dard-e-afsāna sabhī chehroñ pe thā

dard ho laakh yā siine se lahū ristā ho
shabnamī aañkh kā mausam nahīñ karne vaale

dard ke inqalāb se haarā
ek patthar gulāb se haarā

dāstān-e-dard-e-dil ahl-e-vafā kahne lage
ya.anī har āvāz ko terī sadā kahne lage

kyā mirā dard bāñch letā jo
aa.ina ik naqāb se haarā

sab kā hotā hai dard koī na koī
dard kā koī koī hotā hai

is arsa-e-ḳhāmosh meñ ham tanhā khaḌe haiñ
hai dard hamārā to sadā kyuuñ nahīñ dete

mere ham-nafas mere ham-navā mujhe dost ban ke daġhā na de
maiñ huuñ dard-e-ishq se jāñ-ba-lab mujhe zindagī kī duā na de

rāh-e-dard meñ koī ham-safar nahīñ hotā
apnī aag meñ ḳhud hī sham.a saañ pighalte haiñ