Tags-Dard

haath lagā baiThe to jīvan bhar maqrūz raheñge
daam na pūchheñ dard ke sāhab pahle jeb TaToleñ

phailā ke sar pe dard kī chādar chalā gayā
ik shaḳhs merī ruuh pe nashtar chalā gayā

Dūbtā dard kā sūraj tire iz.hār meñ thā
DhūñDne vaalā tujhe zaat ke ambār meñ thā

dard-e-sar hai ḳhumār se mujh ko
jald le kar sharāb aa saaqī

kab giraftār-e-ḳham-e-ġham-e-hijrāñ na rahā
kab tire dard ne āzār kiyā hai barsoñ

pursish-e-dard ko jab vo aane lage
zaḳhm-e-dil misl-e-gul muskurāne lage

na uTThegā dil-e-nāzuk se sadma rañj-e-furqat kā
ilāhī mere dard-e-dil se un ko be-ḳhabar rakhnā

maiñ ne jo dard-e-judā.ī se kiye haiñ naale
kījiye tan se mirā sar pa-e-ta.azīr judā

ġham-e-ayyām kā har ik manzar
shiddat-e-dard baḌhā jaatā hai

dard jab dil meñ samā jaatā hai
lazzat-e-zīst baḌhā jaatā hai

dekhnā dīda-varo āmad-e-tūfān to nahīñ
Tapkī hai dard kī ek buuñd mire dāman meñ

bujh gayā ehsās taarī hai sukūt-e-be-hisī
dard kā daftar gayā sāmān-e-shor-o-shar gayā

vo dard huuñ koī chāra nahīñ hai jis kā kahīñ
vo zaḳhm huuñ ki hai dushvār indimāl mirā

uñglī figār koī na ḳhuuñ meñ qalam huā
kab ham se apne dard kā qissa raqam huā

kī fikr magar baa.is na khulā ai lāla-ruḳh-e-be-mehr-o-vafā
batlā to ye dil kā dard hai kyā gar dāġh-e-jigar hai partav-e-ruḳh

ai yaas na mānūñgā terī bas dil ko ziyāda ab na dukhā
samjhā chukī us kī pahelī nigah dukh-dard jo ho vo sah jaanā

shab ko mirī chashm-e-hasrat kā sab dard-e-dil un se kah jaanā
dāñtoñ meñ dabā kar hoñT apnā kuchh soch ke us kā rah jaanā

dil dard-e-mohabbat se to vāqif bhī nahīñ thā
jānāñ tire baḳhshe hue e.azāz se pahle

har naġhma-e-pur-dard har ik saaz se pahle
hañgāma bapā hotā hai āġhāz se pahle

utrā thā rag-o-pai meñ mire zahr ke mānind
vo dard kī sūrat mire pahlū se uThā thā