Tags-Dard

naġhma-e-shauq ho yā nāla-e-dil
dard-mandāna sadā rakhte haiñ

shaam mushfiq hai qarīb aa dard kā darmāñ kareñ
raat ke sahrā meñ apnā chāra-gar koī nahīñ

ab kahāñ jā.ūñ ye āshob-e-tamannā le kar
dard ko aa gayā mizrāb-e-rag-e-jāñ honā

dard vo bhī sahā hai tere liye
merī qismat meñ jo likhā bhī nahīñ

raqam jab bhī maiñ apnā dard kartī huuñ qalam se to
varaq mātam manāte haiñ siyāhī chīḳh paḌtī hai

halqa-e-shām-o-sahar se nahīñ jaane vaalā
dard is dīda-e-tar se nahīñ jaane vaalā

bahut girāñ hai ye aish-e-tanhā kahīñ subuk-tar kahīñ gavārā
vo dard-e-pinhāñ ki saarī duniyā rafīq thī jis ke vāste se

ḳhāna-e-vasl azā-ḳhāna-e-hastī ki jahāñ
gūñjtī rahtī hai bas dard kī shahnā.ī mirī

qaabū meñ jab dil hī nahīñ to kyā kahūñ maiñ dard-e-dil
baḌh kar hai teġh-o-tīr se mere liye merā nafas

mahshar meñ us bedard se gar pūchh-gachh ne daad kī
aayā huuñ maiñ fariyād ko fariyād sun fariyād-ras

dard-e-mahrūmī-e-jāved hamārī qismat
rāhat-e-vasl-o-mulāqāt ke dar band rahe

'fāriġh' havā.e dard ne lauTā diyā jise
aa.egā ek din mirā ghar pūchhtā huā

hamāre daur kī tārīkiyāñ miTāne ko
sahāb-e-dard se ḳhushiyoñ kā chāñd ubhrā hai

dil kī dhaḌkan tham ga.ī dard-e-nihāñ baḌhtā gayā
jal ga.ī hastī mirī lekin dhuāñ baḌhtā gayā

dard-e-tanhā.ī se sote-jāgte kaaTī thī raat
sub.h ne marham rakhā aisā gavārā ho gayā

kaise hī dard kā sher paḌheñ ve yuuñ bhī na pūchhe kyā bak ga.e
jin ke dil patthar haiñ so kab in bātoñ se pighalte haiñ

kab Thahregā dard ai dil kab raat basar hogī
sunte the vo ā.eñge sunte the sahar hogī

aa.e ḳhayāl apnī zamīñ kā bhī kuchh unheñ
rakhte haiñ dard dil meñ jo saare jahān kā

dard kī dhuup Dhale ġham ke zamāne jaa.eñ
dekhiye ruuh se kab daaġh purāne jaa.eñ

ye hai ik vāqa.ī tafsīl merī āp-bītī kī
bayān-e-dard-e-dil ko ik kahānī kaun kahtā hai