Tags-Dard

koī TuuTe hue ḳhvāboñ se kahāñ miltā hai
har jagah dard kā bistar na lagā yaar mire

mire haath bhī zaḳhm-e-dil kī tarah maiñ TuuT gayā sāhil kī tarah
ai dard-e-ġham-e-hijrāñ tū ne kyā mujh ko diyā kyā chhīn liyā

thoḌī sī aur zaḳhm ko gahrā.ī mil ga.ī
thoḌā sā aur dard kā ehsās ghaT gayā

kisī ke dard-e-mohabbat ne umr bhar ke liye
ḳhudā se maañg liyā intiḳhāb kar ke mujhe

raat ke me.ade meñ kaarī zahr hai jaltā hai jis se tan badan merā
maiñ kab se chīḳhtā huuñ dard se chillātā phirtā huuñ

kāsa-e-dard liye kab se khaḌe sochte haiñ
dast-e-imkān se kyā chiiz na jaane nikle

dard uThā to reza dil kā gosha-e-lab par aan jamā
ḳhush haiñ koī naqsh to ubhrā baare be-tasvīrī meñ

aa.heñ nikal rahī haiñ dil-e-dard-nāk se
fauj-e-ġham-o-alam kā nishāñ dekh lījiye

aflāk merī durd-e-tah-e-jām meñ haiñ gum
tasbīh-e-mahr-o-anjum-o-mah roltā huuñ maiñ

bāzār-e-dil meñ dard kā gāhak nahīñ koī
mīzān-e-ārzū meñ ziyāñ taultā huuñ maiñ

sar par hujūm-e-dard-e-ġharībī se Dāliye
vo ek musht-e-ḳhāk ki sahrā kaheñ jise

ham ko sahnā hai akele hī har ik dard kā bojh
ḳhair-ḳhvāhoñ kā dilāsa nahīñ aane vaalā

ḳhud se lipaT ke ro leñ bahut muskurā liye
ḳhushiyoñ se aaj dard ke pahlū nikāliye

hamrāh tire phuul khilātī thī jo dil meñ
ab shaam vahī dard se ḳhālī nahīñ jaatī

aa.e koī aa kar ye tire dard sambhāle
ham se to ye jāgīr sambhālī nahīñ jaatī

dard baḌh kar davā na ho jaa.e
zindagī be-mazā na ho jaa.e

har na.e dard kī poshāk pahan lī maiñ ne
jaañ mohazzab na huī maiñ thā barahna aisā

vo merā dard-e-dil kyā jānte haiñ
taḌapne ko tamāshā jānte haiñ

ham ne baḳhshī hai ḳhamoshī ko zabāñ
dard majbūr-e-fuġhāñ thā pahle

dard kā chāñd bujh gayā lekin
ġham ke taare tamām raat rahe