Tags-Dard

maddham maddham saañs kī ḳhush-bū mīThe mīThe dard kī aañch
rah rah ke kartī hai bekal aur maiñ likhtā jaatā huuñ

kaif ye dard-e-mohabbat ne kiyā hai paidā
ye dil-āvezī-e-naġhmāt kahāñ thī pahle

har rañg-e-gardish aa.ina ījād-e-dard hai
ashk-e-sahāb juz ba-vidā-e-ḳhizāñ nahīñ

ibrat se pūchh dard-e-pareshānī-e-nigāh
ye gard-e-vahm juz basar-e-imtihāñ nahīñ

tarab kā rañg mohabbat kī lau nahīñ detā
tarab ke rañg meñ kuchh dard bhī samo leñ aaj

jog le kar tirī ḳhātir liye galiyoñ galiyoñ
ik muġhannī kī tarah dard bhī bechā apnā

tumhārī yaad ke ujḌe hue, udaas chaman
nikhar rahe haiñ, mire dard kī phuvār ke saath

ai 'valī' dard-e-sar kabhū na rahe
jab mile sandal-o-gulāb-e-suḳhan

ghulā hai dard fazāoñ meñ is tarah 'sādiq'
ki jaan jaatī hai ik baar muskurāte hue

in havāoñ meñ ye siskī kī sadā kaisī hai
bain kartā hai koī dard purānā apnā

mire liye to ye bekār hone vaalā hai
ye dil ki dard se bezār hone vaalā hai

har-chand dard-e-ishq kā darmāñ nahīñ magar
bantī nahīñ hai fikr-e-mudāvā kiye baġhair

dekhiye sochiye mahsūs to hone diije
dard kī dhuup meñ ehsās kī lazzat le kar

dard kī dhūp-bhare dil kī tamāzat le kar
kaise jaa.e koī ehsās kī hijrat le kar

dard-e-dil ke liye kuchh aisī davā lī ham ne
Tiis gar kam bhī huī aur baḌhā lī ham ne

gir gayā añdhere meñ tere mehr kā sūraj
dard ke samundar se chāñd yaad kā niklā

kaash vo marīz-e-ġham ye bhī dekhtā aalam
chāragar ye kyā guzrī dard jab davā niklā

zer-e-lab aah namī aañkh meñ chup chup tanhā
aise hī hote haiñ ye dard ke maare saare

'yūsuf' apne dard kī sūrat-garī karte hue
ḳhud bhī lauh-e-ḳhāk par tasvīr honā hai mujhe

ai dil tujhe karnī hai agar ishq se bai.at
zinhār kabhū chhoḌiyo mat silsila-e-dard